ઓ મોરભાઈ

તારા મીઠાં ટહૂકાથી ગાજે વનની રે વનરાઈ,

ઓ મોરભાઈ ઓ મોરભાઈ,

વનમાં નિરાંતે કરજે તું મધ મીઠો રે કલશોર,

ધીમે, ધીમે આવીને ખાજે લીમડાનો રે મોર,

તારા ટહૂકા સાથે વરસાદને છે સાચી સગાઈ,

ઓ મોરભાઈ ઓ મોરભાઈ.

શ્રાવણ માસમાં કળા કરી તું તો કેવો નાચતો ?

વરસાદનાં આગમનની રાહમાં તું તો રાચતો,

તારી આગળ-પાછળ ફરતાં ઓલા ઢેલબાઈ,

ઓ મોરભાઈ ઓ મોરભાઈ.

તારા મીઠાં કેકારવથી સઘળું ખુશ થાય રાન,

તારા સુંદર પીંછાથી શોભે તારો કેવો રે વાન ?

આખા જગની સુંદરતા મોરલા તારામાં સમાઈ,

ઓ મોરભાઈ ઓ મોરભાઈ,