માયાળુ મારા ગામ

અહીં તો-

આસ્ફાલ્ટની ઝૂરતી સડકો,

ને અટવાયેલ સૂરજનો તડકો;

ઝીર્ણ કાયે તપતાં-રડતાં ઝાડ, 

ઈંટો માંહ્ય ગૂંગળાતો ઘોંઘાટ;

ચીમનીમાં ચોંટેલાં કાળજાં;

ને ધૂમાડામાં દોડતી શિલાઓ !

મૃગજળમાં હાંફતાં હેત 

જાણે સ્મશાને બરાડતાં પ્રેત !

ક્યાં છે રૂડી પગદંડી ? માયાળુ મારા ગામ ? 

ક્યાં છે કૂંજના એ ટહુકા મારા વૃંદાવન ધામ ? 

મીઠા જળના વેરડા ને દૂધડે ભર્યા નીર ? 

ક્યાં છે માધુરી સીમ ને રસિલાં મંદિર ? 

ઝાડવાંની લીલુડી છાયા ને ભેરુડાનો પટ ? 

આંબલીયાના હિંચકા ને વગડાના સુભટ ? 

ક્યાં છે મોકળા મેદાન ને ગાયોના ધણ ? 

પાણીયારીઓનાં વલોણાં ને પારેવાના મન ?