કારણ શું છે
કારણ શું છે
ચોમાસામાં પલળી શકાતું નથી કારણ શું છે ?
સૂર્યની માફક ઊગી શકાતું નથી કારણ શું છે ?
આંખથી નદી વહી શકે એટલી વેદના છે,
એક આંસુ નીકળી શકતું નથી કારણ શું છે ?
શ્વાસ તો એની મેળે ચાલ્યા કરે છે સતત,
જીવન હવે જીવી શકાતું નથી કારણ શું છે ?
મને જોઈને તે ખુદ પણ રડી પડ્યા અનરાધાર,
ખબર મારી પૂછવા અવાતું નથી કારણ શું છે ?
આજીવન હેરાન કર્યો છે મને સ્વજનોએ,
મરણપ્રસંગે હાજરી આપવાનું કારણ શું છે ?
તારી અસરમાં સાવ એકલા પડી ગયા અમે,
તારી ગલીમાં વળી શકાતું નથી કારણ શું છે ?
પામવું જો હોય તો જતું કરવું પણ પડે,
તારો સ્પર્શ પામી શકતો નથી હું કારણ શું છે ?
દિવાને પછી પ્રગટાવજે પવન મુજબ,
વધતા જતા આ અંધકારનું ખાસ કારણ શું છે ?
રાખી શકુ ફૂલ જેવી કોમળતા તારા માટે,
ફૂલ જેમ હવે ખીલી શકાતું નથી કારણ શું છે ?
પીડા દર્દ આંસુ બધું જ મારા નસીબમાં છે,
મૃત્યુની જેમ નક્કી થવાતું નથી કારણ શું છે ?
ઘણી વાર વ્હેમના લીધે જીવી જવાયું છે,
ખાલી જગા હવે પુરી શકાતું નથી કારણ શું છે ?
સામેથી મૃત્યુને આવકાર આપ્યો આમ,
કબરમાંથી રડવાનો અવાજ આવવાનું કારણ શું છે ?
તારી જ માંગણી છું સદાય માંગી લે હવે,
દ્વાર સુધી હવે આવી શકાતું નથી કારણ શું છે ?
હમણાં કશું યાદ રહેતું નથી એવું કેમ છે,
રડવું તો આવે છે, હસી શકાતું નથી કારણ શું છે ?
મૃત્યુને પણ માફી માંગવી પડશે 'એકાંત'
જીવન દરમિયાન તને રોજ મારવાનું કારણ શું છે ?