એવું કંઈ નથી હોતું
એવું કંઈ નથી હોતું
હર વખત મારા વિશે તમે જે ધારો એવું કંઈ નથી હોતું,
ને આ અલગારી સફરમાં સરનામાં જેવું કંઈ નથી હોતું !
વીતી જાય ભલે ને આખે આખી રાતડી અંધારના સથવારે,
ને ત્યારે સૂરજ ઊભો રહે રસ્તામાં, એવું કંઈ નથી હોતું !
સૂરજના ઉજાસમાં અસ્તિત્વ આખું પડછાયાના સહારે,
ને ખુદ સૂરજને પોતાના પડછાયા જેવું કંઈ નથી હોતું !
ભલે પ્રેમીઓ ઉન્માદમાં ઉપમા મિલનની આપે યુગોથી,
ક્ષિતિજે ધરતી ને આભ મળતા હોય, એવું કંઈ નથી હોતું !
લાભ હાનિ તો એક જરૂરી હિસ્સો છે આ સુંદર સંસારનો,
સમર્પણની સ્થિતિમાં નફો નુકશાન જેવું કંઈ નથી હોતું !
ઘોંઘાટના નગરમાં જે વસે છે એને જ ગોતે છે માનવ,
એ સન્નાટાને અવાજની ખબર હોય, એવું કંઈ નથી હોતું !
એ તો સંકોચાય સ્પર્શ થકી એના સ્વભાવ મુજબ જન્મથી,
લજામણીને શરમ ખરેખર આવે, એવું કંઈ નથી હોતું !
આ તો નશો છે અમને "પરમ" નો કોણ જાણે કેટલા યુગોથી,
ને મારી ભીતર કોઈ હોય છે "પાગલ", એવું કંઈ નથી હોતું !