Quotes New

Audio

Forum

Read

Contests


Write

Sign in
Wohoo!,
Dear user,
ରଜରେ ଗ’ପାଳ ବୁଲା
ରଜରେ ଗ’ପାଳ ବୁଲା
★★★★★

© Neelima Nivedita Behera

Others

4 Minutes   7.3K    21


Content Ranking

 [୧]

ଜମାରୁ ଏଗାରୁଟା ମାସ ପୁରିନି ଏ କଲୋନୀକୁ ଆସିବା । ଗାଁ-ଗହଳି ଭଳି ତ ଆଉ ଏଠା ସହରରେ ସାଇପଡ଼ିଶା ନାହାଁନ୍ତି ଯେ ବେଳ ଉଣ୍ଡି ସୁନୟନା ଯାଇ କାହା ଦୁଆରେ ଘଡ଼ିଏ ଠିଆ ହେଇଯିବେ, କାହା ସାଙ୍ଗରେ ଦି’ପଦ ସୁଖ-ଦୁଃଖ ହେବେ ! ଘର କମ୍ ବନ୍ଦିଶାଳା ବେଶି ମାଲୁମ୍ ପଡ଼େ ତାଙ୍କୁ । ହେଁ ହେଁ ଦି’ପୁରୁଷ ଉଚ୍ଚାର ଲୁହା କବାଟ । ସେ କବାଟ ଖୋଲିଲେ ପୁଣି ହଜାରେ ରକମର ଘଁ ଘାଁ ଗାଡ଼ିମୋଟର । ଘରୁ ବାହାରିଲେ ଯଦିଓ ବାଁପଟେ ଛଅଟା ଘର ଟପିଲେ ଈଶେନେଶ୍ଵର ମନ୍ଦିର । ମନ୍ଦିରକୁ ଲାଗି ବଉଳ, ଆମ୍ବ, ପଣସ, ନଡ଼ିଆ, ନିମ୍ବ ଆଦି ନାନା ଜାତିର ଗଛବୃଛ । ପୁଳାଏ ମାଟି ଅଛି ବୋଲି ନାନା ପ୍ରକାରର କୁନିକୁନି ଫୁଲ ଗଛମାନ । ମନ ଭିତରର ଯାବତୀୟ ଅଭିଯୋଗ ତେଣୁ ସେଠା ହନୁମାନ, ଶିବ, ରାଧାକୃଷ୍ଣ, ମଙ୍ଗଳା, ଗଣେଶ ଆଦିଙ୍କ ନିକଟରେ ସେ କରନ୍ତି ତଥାପି ମନ୍ଦିର ଗଲାବେଳେ ଆଖି ବୁଲାନ୍ତି ଚାରିଆଡ଼େ, ଖୋଜନ୍ତି କେହି ଆପଣାର ଜଣକୁ ।

ଚାରି ନମ୍ବର ଘରେ ରୁହନ୍ତି ନବବିବାହିତା ହଳେ ଦମ୍ପତି । ହେଲେ ସୁନୟନା ନିଇତି ଦେଖନ୍ତି, ପୁଅଟି ଗାଡ଼ି ନେଇ ବାହାରିଗଲା ପରେ ଝିଅଟି ଭାରି ଡହଳବିକଳ ହେଇ ମୁହଁ ଶୁଖେଇ ଝରକା ରେଲିଂ ପାଖରେ ଠିଆ ହେଇଥାଏ । ମାଙ୍କଡ଼ ଭଳି ରାମ୍ପିରୁମ୍ପି ହଉଥାଏ ଦିହମୁଣ୍ଡଯାକ । ଅଲରା ବାଳରେ ପୁରୁଣା ସାୟାରୁ ଖଣ୍ଡେ ଦେହରେ ଗଳେଇ ପାନିଆଟେ ଧରି ଜୁଳୁଜୁଳୁ ଚାହୁଁଥାଏ ରାସ୍ତା ଆଡ଼କୁ । ଅଟକି ଯାଇ ଝରକା ପାଖରେ, ଦିନେ ସାହସ କରି ପଚାରିଦେଲେ ସୁନୟନା,

- କ’ଣ ହେଇଛିକି ଲୋମାଆ ତୋର ?

- କିଛି ନାଇଁମ ମାଉସୀ । ମୁଁ ଗର୍ଭବତୀ । କିନ୍ତୁ ପେଟରେ ଛୁଆ ରହିଲା ଦିନୁ......

- ରହିଲା ଦିନୁ...... ? (ସ୍ଵର ଲମ୍ବିଲା ସୁନୟନାଙ୍କର)

- ଛୁଆ ରହିଲା ଦିନୁ ଦେହହାତ ଚାରିଆଡ଼େ କୁଣ୍ଡେଇ ହେଉଛି, ମାଉସୀ । ଅସମ୍ଭବ ପ୍ରକାରର କୁଣ୍ଡେଇ । ଦିନ, ରାତି ସବୁବେଳେ । ହାଇ ଡାଇବେଟିସ୍, ହାଇ ବ୍ଲଡପ୍ରେସର୍, ହାଇ ଥାଇରଏଡ୍ ସବୁ ବାହାରିପଡିଛି ଏକାବେଳେ ।

- ଓଃ !!! ଏ ଖୁସି ନା ଦୁଃଖ ??? ମୁଁ ତ ଆଚମ୍ବିତ !!!

- ଭିତରକୁ ଆସୁନାହାଁନ୍ତି ? (ଘର ଭିତରୁ ଜଣେ ମଧ୍ୟବୟସ୍କା ମହିଳା ବାହାରିଆସି ସୁନୟନାଙ୍କୁ ଡାକିଲେ)

[୨]

- ବରଷକେ ଥରେ ଆସିଛି ରଜ

ଆସିଛି ରଜ ଲୋ ଘେନି ନୂଆ ସଜବାଜ

ସଖୀଲୋ, ଘେନି ନୂଆ ସଜବାଜ...।

- ନାଇଁ ଲୋ ସୁମୀ । ଏ ରାଜଧାନୀରେ, ଚାରି କାନ୍ଥ ଭିତରେ ପୁଣି କି ରଜ ?

- କାଇଁ ଏମିତି କହୁଛୁ ସୁନା ? ଦେଖୁନୁ, ମୁଁ ତ ଆଇଛି ତୋ ଘରକୁ । ରଜ ବୁଲି । ସାଙ୍ଗରେ ରଜ ପାନ ଆଉ ପୋଡ଼ପିଠା ଘେନି ।

- ନଗଦା ବୋହୂ ଆଣିଛୁ ଲୋ ତୁ । ଝୁଅର ବି ଯାଆଁଳା ଛୁଆ, ତିନି ଜଣ ନବାଗତାରେ ଘର ଖାଲି ତୋର ଉଠୁଥିବ ଆଉ ପଡୁଥିବ । ଖୁସିର ସୁଅ ଛୁଟୁଥିବ, ଦାଣ୍ଡ, ଅଗଣା ଓ ବାରିରେ । ହଁ, ତୋ ପାଇଁ ରଜ ଲୋ ସୁମୀ ।

- ମନ କାଇଁ ମାରୁଛୁ ସୁନା ? ଖାସ୍ ତୋରି ପାଇଁ ବାରିପଟେ ଖନ୍ଦା ଖୋଳି ଚୁଲିଟେ ପକେଇଛି । ଆମ ସେପଟରେ ଘରେ ଝିଅ ଅଛି ମାନେଇ ଯେମିତିହେଲେ ବି ପୋଡ଼ପିଠାଟିଏ ହେବ । ଆଉ ଏବେ ତ ମୋ ଘରେ ତିନି ତିନିଟା ଝିଅ । ବୋହୂମା ରିନା, ମୋ ଝିଅ ମିଲି ଆଉ ତା’ ନବଜନ୍ମିତା ଆଇଶା । ମୁଁ ଜାଣେ ସୁନା, ତୁ ପିଠା କରିପାରି ନଥିବୁ, କିନ୍ତୁ ତୋ ଅସୁସ୍ଥତା କାରଣରୁ କ’ଣ ଆଜି ଭଳି ରଜ ପରାଟାରେ ଆମ ଲୀନା ପୋଡ଼ପିଠା ଖଣ୍ଡେ ଖାଇବନି ?

- ହିଃ ହିଃ ହିଃ ! (ଜୋର୍ ରେ ହସି ଉଠିଲେ ସୁନୟନା)

- ହସିଲୁ ଯେ ? (ସୁମିତ୍ରା ଦେବୀ ବି ଚକିତ ହେଇ ପଚାରିଲେ)

- ଲୀନା ତ ସକାଳୁ ଉଠି ପିଠା ତରକାରୀ ଖାଇସାରିଲାଣି ଲୋ ଭଉଣୀ । କାଲି ସଞ୍ଜବେଳେ ଯାଇଥିଲା କେହିଜଣେ ଆର୍ଟିସ୍ଟଙ୍କୁ ଭେଟିବାକୁ । ହେଲେ ସେ ଜଣେ ଖୁବ୍ ଅମାୟିକ ମଣିଷ । କେଇଟା ମୂହୁର୍ତ୍ତରେ ବଡ ଭାଇ ସାଜି ଲୀନାକୁ ଶ୍ରଦ୍ଧାର ସହ ପୋଡ଼ପିଠା ଆଉ ଖାସ୍ତାଗଜା ଖୁଆଇଲେ । ପୁଣି କିଛି ଘରକୁ ବି ପଠେଇଥିଲେ ଆମ ବୁଢାବୁଢୀଙ୍କ ପାଇଁ । ତୋ ପରେ ଏତେଦିନିକେ ପୁଣିଥରେ ଲାଗିଲା ଯେ ଏ କଂକ୍ରିଡ୍ ଜଙ୍ଗଲରେ ଅମ୍ଳଜାନ ନେଉଥିବା କେଇଟା ଅସଲି ମଣିଷ ଗଛ ବି ଅଛନ୍ତି ।

[୩]

“ସେକାଳ ପଖାଳ ନାଇଁରେ ଗୋପାଳ ।“

ସେତେବେଳେ ସଜବାଜ ଦିନ ହିଁ ସବୁକାମ ସରେ । କରୁଣା ତେଲିଠୁ ଗୁଡ଼, ଘିଅ, ମସଲା ସାମଗ୍ରୀ ସବୁ ଧାର୍ ଆସେ । ସକାଳୁ ଉଠି ବୋଉ, ବଡ଼ ବୋଉ,ମିଳିମିଶି ଧାନ କୁଟି, ଚୂନା କରି, ବିରି ବାଟି ପୂର୍ବ ପ୍ରସ୍ତୁତି ସାରିଦିଅନ୍ତି ଆଉ ରାତିକି ଗଢାହୁଏ ଆରିସା, କାକରା ଓ ପୋଡ଼ପିଠା ଇତ୍ୟାଦି । ଡେରିରାତି ଯାଏଁ ଚୁଲି ଜଗି ବସିବାକୁ ପଡ଼େ । ତା’ପରେ ରାତି ଖିଆ ବାସନକୁସନ କୂଅମୂଳୁ ମାଜି ଆଣି, ଘର ଲିପାପୋଛା ହୁଏ । ପ୍ରଥମ ରଜ ମାନେ, ବଡି ଭୋଅରୁ ଉଠି ବୋଉମାନେ ଗାଧେଇ ଆସି ଘାଣ୍ଟ ତରକାରୀ ପାଇଁ ଯୋଗାଡ଼ଜନ୍ତ୍ର ଆରମ୍ଭ କରନ୍ତି । ବୁଢା ଚକୁଳି ହେଉ କି ସେ ସରୁ ଚକୁଳି, ପଲମ ଉପରେ ବୁଲଉ ଥିଲାବେଳେ ତା’ର ଯୋଉ ବାସ୍ନା ! ଆହାଃ !!! ଦାନ୍ତକାଠି ସଇତେ ସଜବାଜ ଦିନରୁ ହିଁ ଭଙ୍ଗା ହେଇ ରଖାଯାଉଥିଲା । ସକାଳ ସାଢେ ଆଠ ନ ବାଜୁଣୁ ରୋଷେଇ ସାରି ରନ୍ଧା ଖାଦ୍ୟସବୁ ପ୍ରଥମେ ପିତୃପୁରୁଷଙ୍କୁ ବାହାରଘରେ ଦିଆଯାଏ । ତା’ପରେ ବାପା, ବଡ଼ ବାପା ଆଉ ମଝିଆଁ ବାପା ଖାଇପି’ କାମରେ ବାହାରି ଯାଆନ୍ତି । ଆମେ ଛୁଆସବୁ ଉଠି, ନିତ୍ୟକର୍ମ ସାରି, ନୂଆ ଜାମା ପିନ୍ଧୁ । ବଙ୍ଗମିଆ ଦୋକାନରୁ ରଜରେ ସମସ୍ତଙ୍କ ପାଇଁ ନୂଆ ଜାମା ଖଣ୍ଡେ ଲେଖାଏଁ ବାକିରେ କିଣା ହୁଏ । ଝିଅମାନେ କୁଟା ଖଣ୍ଡେ ଦି’ଖଣ୍ଡ କରନ୍ତିନି ସେଇ ତିନିଦିନ । ପାଦରେ ଅଳତା, ମଥାରେ ଚନ୍ଦନ ଟିପା ଲଗେଇ ସଜ ହୁଅନ୍ତି । ପୁଅମାନେ ବାଗୁଡି, ତାସ୍ ଆଉ ଖୋକ ଖେଳନ୍ତି । ଆଉ ଦିନସାରା ପିଠାପଣାରେ ପେଟ ପୂଜା କରନ୍ତି ସଭିଏଁ । ତୋଟାରେ ବାଉଁଶ ଦୋଳି, ପଟା ଦୋଳି ବନ୍ଧାଯାଏ । ତୋଟା ତ ତୋଟା, ଘର ଓରାମାନଙ୍କରେ ବି ବନ୍ଧାହୁଏ ୪-୬ଟା ଲେଖାଏଁ କୋରଟ ଦୋଳି । ତକିଆ ପକେଇ ଝୁଲୁଥାଉ ଆମେ ଭାଇଭଉଣୀମାନେ ଆଉ ସାଙ୍ଗ ମାନେ ମିଶି ଗ’ପାଳ ବୁଲି ଗଲାବେଳେ ଗୀତ ଗାଉ,

ବରଷକେ ଥରେ ଆସିଛି ରଜ

ଆସିଛି ରଜ ଲୋ ଘେନି ନୂଆ ସଜବାଜ

ସଖୀଲୋ, ଘେନି ନୂଆ ସଜବାଜ...।

ସୁନୟନା ରାଜଧାନୀ ରଜ

Rate the content


Originality
Flow
Language
Cover design

Comments

Post

Some text some message..