ନାହିଁ ନାହିଁର ଜୀବନ
ନାହିଁ ନାହିଁର ଜୀବନ
ଏଇ ରାସ୍ତା କଡର
ଜୀବନ୍ତ ମଣିଷମାନଙ୍କୁ ଯେପରି
ଚିଡିଆଖାନାର ଜୀବଜନ୍ତୁ ପରି
ଆଶ୍ଚର୍ଯ୍ୟ ଚକିତ ଦୃଷ୍ଟିରେ
ଦେଖି ଦେଖି ଏଠି
ଥିଲାବାଲା ପୁଞ୍ଜିପତି ଭାବନ୍ତି
ଏ ଗୋଟେ କି ଜୀବନ ?
ଇଏ ତ ଖାଲି
ନାହିଁ ନାହିଁର ଜୀବନ,
ଏ ଜୀବନର ମୂଲ୍ୟ କିବା କୁହତ ?
ସତରେ ଏ ରାସ୍ତା କଡର ଜୀବନ
ଆଜି ଏଠି ତ କାଲି ସେଠି l
ଏମିତି ଜୀବନ
ଜିଉଁଥିବା ଲୋକଙ୍କର
ଘର ପାଇଁ ଆବଶ୍ୟକତା ପଡେନି
ରଡ୍, ଗୋଡି,ଇଟା,ବାଲି କି ସିମେଣ୍ଟ l
ଏ ଜୀବନରେ କୌଣସି
ଗର୍ବ ଅଂହକାର ନାହିଁ l
ଛନ୍ଦ କପଟ କଣ
ଏମାନେ ଜାଣନ୍ତି ନାହିଁ l
ବ୍ଲଡ୍ ପ୍ରେସର୍ କି ଡାଇବେଟିସ୍
ତାଙ୍କ ପାଖ ମାଡିବାର ନାହିଁ l
ଅତୀତର କଥା
କିଛି ଭାବିବାର ନାହିଁ l
ଭବିଷ୍ଯତର କୌଣସି
ଯୋଜନାରେ ମାତିବାର ନାହିଁ l
ଜୀବନ ପ୍ରତି ଅହେତୁକ
ମୋହ ନାହିଁ କିମ୍ବା
ମୃତ୍ଯୁକୁ ଭୟ ବି ନାହିଁ l
ଏ ଜୀବନରେ କିଛି
ଜାକଜମକ ନାହିଁ l
ବିବାହ ବାର୍ଷିକି କି ଜନ୍ମଦିନ
ପାଳନ କରିବାର ନାହିଁ l
ସେସବୁ ତିଥି ତାରିଖ ବାର
ସେମାନେ ମନରେ ରଖନ୍ତି ନାହିଁ l
ସ୍ୱପ୍ନ ଦେଖିବାର ନାହିଁ
କିମ୍ବା ଜୀବନ ଯୁଦ୍ଧରେ
ହାରିଯିବାର ଭୟ ବି ନାହିଁ l
ଅନ୍ୟ କାହାଠୁ କିଛି
ମାରିନେବାର ଅଭିପ୍ରାୟ ବି ନାହିଁ l
ସେମାନେ ବର୍ତ୍ତମାନରେ
କେବଳ ଜିଇଁବା ଶିଖିଛନ୍ତି l
ନୀରବତା ହିଁ ତାଙ୍କ ଭାଷା
କର୍ମ ହିଁ ତାଙ୍କ ଜୀବନ l
ଖଟିଲେ ଖାଇବେ
ନମିଳିଲେ କାହା ପାଖରେ
ଅଭିଯୋଗ କାରିବାର ନାହିଁ ।
ସତରେ ଏଇ ନାହିଁ ନାହିଁର ଜୀବନ
କେବଳ କଣ ତାଙ୍କ ପାଇଁ ଉଦ୍ଦିଷ୍ଟ ?
ତଥାପି ସେଠି ହିଁ
ଦେଖିହୁଏ ଅନାବିଳ ପ୍ରେମ
ନିରୁତା ଭଲପାଇବା
ଆଉ ଅଳ୍ପରେ ସନ୍ତୁଷ୍ଟି ହେବାର
ସମସ୍ତ ମନୋଭାବର ଲକ୍ଷଣ l