ଭକ୍ତ ଭଗବାନ ଏକାକାର
ଭକ୍ତ ଭଗବାନ ଏକାକାର
କାଳିଆ ସାଅନ୍ତ ହେ !
ବିଭିନ୍ନ ବାଦ୍ୟର ତାଳେ ତାଳେ
ନର୍ତ୍ତକୀଙ୍କର ନୃତ୍ଯର ଛନ୍ଦେ ଛନ୍ଦେ
ଝୁଲି ଝୁଲି ନନ୍ଦିଘୋଷ ରଥେ
ଭକ୍ତସହ ବଡଦାଣ୍ଡରେ
ହୋଇ ଏକାକାର
ବାହୁଡି ଆସନ୍ତି ଶ୍ରୀଗୁଣ୍ଡିଚାରୁ
ପ୍ରଭୁ ଶ୍ରୀଜଗନ୍ନାଥ ।
ଲୀଳାମୟ ହେ !
ତୁମ ମାନବୀୟ ଲୀଳାରେ
ତୁମ ପ୍ରେମରେ,ରଙ୍ଗରେ ଓ ରସରେ
ଭକ୍ତ ଆଜି ହୋଇ ଆତୁର
ହୁଳହୁଳୀ, ହରିବୋଲ ଓ
ଜୟ ଜଗନ୍ନାଥ ଧ୍ୱନୀରେ
ସତେ ଅବା ପଡେ ଉଠେ ବଡଦାଣ୍ଡ ।
ଦାରୁବ୍ରହ୍ମ ହେ !
ରଥ ପଥରେ ନ ଥାଏ
କିଛିର ବାଛବିଚାର
ଭେଦ ଭାବ ନାହିଁ ସେଠି
ଦେଶ, ଜାତି, ଧର୍ମ କି ବର୍ଣ୍ଣର
ସମସ୍ତଙ୍କର ସେଇ
ଗୋଟିଏ ପରିଚୟ
ତାହା ହେଉଛି
କେବଳ ଭକ୍ତର ।
କଳାକାହ୍ନୁ ହେ !
ରସିକ ନଟବର
ତୁମ ସ୍ପର୍ଶରେ ଆସି
ଦେବତା ପାଲଟି ଯାଆନ୍ତି
ଶରଧା ବାଲି, ରଥର ପଥ
ସେଇ ବଡଦାଣ୍ଡ ଆଉ
ସିଂହଦ୍ବାର ଓ ବାଇଶି ପାହାଚ
ସହ ନନ୍ଦିଘୋଷ ରଥ ।
ଜଗନ୍ନାଥ ହେ !
ତୁମ ରଥାରୁଢ
ଅପୂର୍ବ ରୂପକୁ ଦେଖିବାକୁ
ଭକ୍ତ ବି ଭାବର ସାଗରେ
ସେଠି ହୁଏ ଉବୁ ଟୁବୁ
ଖାସ୍ ସେଥି ପାଇଁ ତ
ବଡଦାଣ୍ଡ ଆଜି
ପାଲଟି ଯାଇଛି
ଭକ୍ତର ସମୁଦ୍ର ।
ଜୟ ଜଗନ୍ନାଥ ।
*******************
ପ୍ରଶାନ୍ତ କୁମାର ବେହେରା
ଅଧ୍ଯାପକ , ରାଜନୀତି ବିଜ୍ଞାନ ବିଭାଗ,
ସ୍ୱାମୀ ବିବେକାନନ୍ଦ ସ୍ମାରକ ସ୍ୱୟଂଶାସିତ ମହାବିଦ୍ୟାଳୟ,
ଜଗତସିଂହପୁର l
ଦୂରଭାଷ - ୯୪୩୭୧୩୫୯୧୬