ରାସ୍ତା ସମ୍ପର୍କରେ
ରାସ୍ତା ସମ୍ପର୍କରେ
ଚାଲିବା ଆରମ୍ଭ କଲେ
ପରାମର୍ଶ ଦିଅନ୍ତି ସମସ୍ତେ
ନାକସିଧା ଯିବାପାଇଁ
ସର୍ପିଳ ଭଙ୍ଗୀରେ ଲମ୍ବିଥିବା
ଅଙ୍କାବଙ୍କା ଅଜଣା ରାସ୍ତାରେ।
ଏମିତି କ୍ଷେତ୍ରରେ
କେମିତି ବା ଦ୍ଵନ୍ଦ ନ ଆସିବ,
କେମିତି ବାଛିବ ଜଣେ
ଗନ୍ତବ୍ୟ ରେ ପହଞ୍ଚିବା ପାଇଁ
ସଂକ୍ଷିପ୍ତ ଓ ସହଜ ରାସ୍ତାଟେ !
ତମେ କୁହ, ତମେ ହେଇଥିଲେ
କି ସିଦ୍ଧାନ୍ତ ନେଇ ପାରିଥାନ୍ତ?
ସେ ରାସ୍ତାରେ ଗୋଟେ ପାଦ ଥାପି
ଆର ପାଦ ନିଃଶଙ୍କ ଚିତ୍ତରେ
ଉଠେଇ ନେଇଥାନ୍ତ ଭୂଇଁରୁ !
ନା, ଯେଉଁଠି ଅଛ ସେଇଠି
ମାଟିରେ ପାଦ ପୋତିଦେଇ
ମୃତବତ ସ୍ଥିର ରହିଥାନ୍ତ ?
ଅଜ୍ଞାତ ନଥିବ ତମକୁ,
କିଛି ରାସ୍ତା ଏମିତି ବି ଥାଏ
ବେଶ କିଛିବାଟ ଗଲାପରେ
ଲମ୍ବି ନଥାଏ ଆଗକୁ,
ଅକସ୍ମାତ ଛିଣ୍ଡି ପଡିଥାଏ
ଅଧାରୁ ସେଇଠି କେମିତି।
ସବୁଜାଣି କାହିଁକି କେଜାଣି
ସୁତେ ସୁତେରେ ଭୁଲ ହେଇଯାଏ
ମୁଣ୍ଡରେ ପଶେନା ଏ କଥା
ସବୁରାସ୍ତା ଯିବାପାଇଁ ନୁହେଁ,
ସଠିକ ରାସ୍ତାଟେ ବାଛିବା
ଏକାନ୍ତ ଜରୁରୀ
ଗନ୍ତବ୍ୟରେ ପହଁଚିବା ପାଇଁ
ସବୁଠୁଁ ସ୍ୱଳ୍ପ ଅବଧିରେ,
ସବୁଠାରୁ କମ ଚାଲିବାରେ,
ଚାଲିବା ଭିତରେ କେବେ
ଥକି ନ ଯିବାକୁ,
ଝୁଣ୍ଟି ନପଡିବାକୁ
ଆରମ୍ଭରୁ ଅନ୍ତ ଯାଏଁ।।
===== ©=====
ବିନୟ ଭୂଷଣ ପାଣିଗ୍ରାହୀ( ମିଟୁ)
ହରସିଂହ ପୁର,ପିରହାଟ, ଭଦ୍ରକ
୯୯୩୭୫୪୮୪୩୧
୯୪୩୮୬୭୦୧୨୦
(ଏସ-୫/୩୪୨,ନୀଳାଦ୍ରି ବିହାର,
ଚନ୍ଦ୍ରଶେଖର ପୁର,ଭୁବନେଶ୍ୱର-୨୧)