ନିରୁଦ୍ଦିଷ୍ଟ କି ଆଜି ତୁମେ -୧
ନିରୁଦ୍ଦିଷ୍ଟ କି ଆଜି ତୁମେ -୧
ବିକେଶ ସାହୁ
ହେ ଈଶ୍ୱର !
ତୁମେ ଆଜି କେଉଁଠି ?
ନଭ ଚୁମ୍ବି ଗୀର୍ଜାରେ
ନା ମସଜିଦର ଆସ୍ଥାନରେ
ମନ୍ଦିରର ପାଷାଣ ମୂର୍ତ୍ତିରେ
ନା ଗୁରୁଦ୍ୱାର ସମାଧି ଭିତରେ
ବିତ୍ତଶାଳୀର ସ୍ୱର୍ଣ୍ଣ ମହଲରେ
ନା ନିର୍ଦ୍ଧନର ଜୀର୍ଣ୍ଣ କୁଟୀରେ
ନିରୁଦ୍ଦିଷ୍ଟ କି ଆଜି ତୁମେ ଏଇ ମହୀତଳେ ?
ତୁମେ କି ଆଜି ବନ୍ଦି ?
ବଡ଼ ପଣ୍ଡାର ପୂଜା ଆଉ ମନ୍ତ୍ରରେ
ପାଦ୍ରୀର କ୍ୟାଣ୍ଡେଲରେ
ମୌଲବୀର ନିତ୍ୟ ପ୍ରାର୍ଥନାରେ
ଯୋଗୀର ଯୋଗ ସାଧନରେ
ଅମୀରର ସ୍ୱର୍ଣ୍ଣ ମହଲରେ
ଧୂପ ଦୀପ ଚନ୍ଦନ ସୁଗନ୍ଧେ
ବ୍ରାହ୍ମଣର ବେଦ ମନ୍ତ୍ରେ
ବନ୍ଦି କି ତୁମେ ସେଇ ଅନ୍ଧାର ପ୍ରକୋଷ୍ଠେ ?
ତୁମେ ତ ଆଜି ପ୍ରଶ୍ନବାଚୀ
ପ୍ରତି ମଣିଷ ମନରେ
ସନ୍ଦେହ ତୁମ ଅସ୍ତିତ୍ୱ ଉପରେ
ନ୍ୟାୟର ନା ତୁମେ ଅନ୍ୟାୟର ?
ହିନ୍ଦୁର ନା ତୁମେ ମୁସଲିମର ?
ପାଦ୍ରୀର ନା ତୁମେ ଶିଖର ?
ବୌଦ୍ଧର ନା ତୁମେ ଜୈନର ?
ଅମୀରର ନା ତୁମେ ଫକୀରର ?
ପ୍ରଶ୍ନର ପାହାଡ଼ ଆଜି ତୁମ ଉପରେ
ତଥାପି ତୁମେ ବଞ୍ଚିଛ
ସନ୍ଦେହର ଅନ୍ଧାରି ପ୍ରକୋଷ୍ଠେ
ନିରୁଦ୍ଦିଷ୍ଟ କି ଆଜି ତୁମେ ତୁମରି ସୃଷ୍ଟିରେ ?