ହୋଲି

ଶଶୀ ଭୂଷଣ ମହାପାତ୍ର

ହୋଲି ଆଜି ରଙ୍ଗମତୀ

ଚିତ୍ରିତ ପ୍ରଜାପତି

ରଙ୍ଗର ଛିଟିକା ଝାଡ଼ି

ଉଡ଼େ ନୀଳ ଆକାଶରେ

ମଳୟ ପବନ ସାଥେ

ପ୍ରେମରେ ବତୁରି ବତୁରି|

ପ୍ରୀତିରେ ଜଡେଇବ

ତନୁ ମନ ଭିଜେଇବ

ସ୍ବପ୍ନ ଦେଖେଇବ

ରଙ୍ଗର ଇନ୍ଦ୍ରଧନୁସେ

ହୋଲି ଫଗୁଣର |

ରଙ୍ଗର ପସରାରେ

ତୁଳିବି ରହିଛି,

ନାଲି,ନେଳି,ନାରଙ୍ଗୀରେ

ଆଙ୍କିଦେବ ନୂଆ ସମ୍ପର୍କ

ତୁମେ ଖାଲି ମନକୁ

କରିନିଅ କାନଭାସ |

ଦେଖ, ଦେଖ ଚାରିଆଡେ

ପ୍ରେମର ମୁକ୍ତ ଗୁଞ୍ଜରଣ,

ରଙ୍ଗରେ ରଙ୍ଗରେ

ମନରେ ମନରେ ଥାଏ

ସ୍ନେହ, ପ୍ରେମ, ବିଶ୍ୱାସର

ଅୟୁତ ଅୟୁତ ସମର୍ପଣ |

ଅହଂକାର ଲିଭିଯାଉ

ଭଲ ପାଇବାର ରଙ୍ଗରେ

ମନକୁ ମନରେ ଜଡାଇ

ଜୀବନ ରଙ୍ଗମୟ ହେଉ

ତୁମ ମନ,ମୋ ମନ

ଛୁଇଁ ଛୁଇଁ,

ହୋଲିର ମହୋତ୍ସବେ

ଫଗୁଣ ବିଦାୟ ନେଉ,

ରସାପ୍ଳୁତ ଅନୁଭବର

ଏ ହସ୍ତାକ୍ଷର ଥାଉ |

***********