ନୂଆ କାହାଣୀ
ନୂଆ କାହାଣୀ
(ମଜାରେ ମଜାରେ ମଞ୍ଜି କଥା)
ଏଠି ଚନ୍ଦା ହେଉଛି ନଣ୍ଡା
ମିଳୁଛି ପ୍ଲାଷ୍ଟିକ ଅଣ୍ଡା
ଚିକେନ୍ ଖାଉଛି ପଣ୍ଡା
ମଦୁଆ ସାଜୁଛି ଭେଣ୍ଡା ।
ପ୍ରେମର ନାମରେ ଧରି ବୁଲୁଥାନ୍ତି
ପ୍ରେମିକ ଗଣ୍ଡାକୁ ଗଣ୍ଡା ।
ଏଠି ବିବେକକୁ ବନ୍ଧା ଦେଇ
ମାନ ମହତକୁ ଖାଇ
ବିଭୁତି ଟିକିଏ ପାଇ
ବାବାଙ୍କ ପଛରେ ବାଇ
ଛୁଆ ପିଲା ଯଦି ହେଉନି କାହାର
ଛାଡ଼ୁଛି ମଠରେ ନେଇ ।
ଏଠି ଶ୍ରାବଣେ ଫାଟୁଛି ଭୂଇଁ
ଗ୍ରୀଷିମେ ଫୁଟୁଛି କଇଁ
ବୈଶାଖରେ ଭରା ନଈ
ସ୍ୱାର୍ଥରେ ହୋଇଣ ବାଇ
କନ୍ୟା ଭ୍ରୁଣ ହତ୍ୟା ହେଉଥାଏ ନୀତି
ପୁତ୍ର ସନ୍ତାନଟେ ପାଇଁ ।
ଏଠି କାନ୍ଦୁଛି ନୀରିହ ନାରୀ
ଧର୍ଷଣ ରହିଛି ଜାରି
ଲୁହ ତା ପଡୁଛି ଝରି
କଳଙ୍କରେ ଯାଏ ମରି
ନାରୀଟିଏ ଆଜି ବାହାରି ପାରୁନି
ରାକ୍ଷସ ମାନଙ୍କୁ ଡରି ।
ଏଠି ଇଂଲିଶ ପଛରେ ବାଇ
ଫେଣ୍ଟା ଓଡ଼ିଆକୁ କହି
ନପଢି ଓଡ଼ିଆ ବହି
ଫରେନକୁ ଖାଲି ଧାଇଁ
ସଭା ସମିତିରେ ଭାଷଣ ଦିଅନ୍ତି
ଭାଷାର ସୁରକ୍ଷା ପାଇଁ ।
ଏଠି କଦଳୀ ଲାଗୁଛି ରାଗ
ଛାତରେ ହେଉଛି ଶାଗ
ଘଣ୍ଟାକେ ବଦଳେ ପାଗ
ନିରୀହ ଚରିତ୍ରେ ଦାଗ
ବ୍ୟଙ୍ଗର ଛଳରେ କହି ବୁଲୁଥାନ୍ତି
ଦ୍ଵିଅର୍ଥ ବୋଧକ ଢଗ ।
ଏଠି ପାଣିରେ ପଡୁଛି ସର
ସୀମାରେ ମରୁଛି ବୀର
ଛନ୍ଦ କପଟର ଖେଳ
ବଢି ଚାଲେ ବ୍ୟଭିଚାର
ବାପା ମାଆ ପାଖେ ବଡ଼ ହୋଇ ପୁଅ
ଝିଅକୁ ନେଇକି ପାର୍ ।
ଏଠି ବାହା ହେଲା ପରେ ପୁଅ
ମାଆର ଆଖିରେ ଲୁହ
ଯାହାବି କହିଲେ କୁହ
ବାସଇ ସ୍ତ୍ରୀର ଦେହ
ପାନରୁ ଚୂନ ଖସିଗଲେ କୁହେ
ବୃଦ୍ଧା ଶ୍ରମେ ଯାଇ ରୁହ ।
ଏଠି ସ୍ନେହ ପ୍ରେମ ସବୁ ମିଛ
ସମ୍ପର୍କ ହେଲାଣି ତୁଚ୍ଛ
ଭାବନାଟା ଅତି ନୀଚ
ମିଛ ବି ଆଇନା କାଚ
ପୂଜା ପରବରେ ଠାକୁର ଆଗରେ
ଚାଲେ ଲୁଙ୍ଗି ଟେକା ନାଚ ।
ଏଠି ଭୋଅଟ ଖଣ୍ଡିଏ ପାଇଁ
ନେତା ଆସୁଥାନ୍ତି ଧାଇଁ
ମଉସା ମାଉସୀ କହି
ଭୋଅଟ ନେବ ହାତେଇ
ତା ପାଖକୁ ତୁମେ ଧାଉଁଥିବ ପଛେ
ପାଦରୁ ଜୋତା ଛିଡେଇ ।
ଏଠି ମତଦାନ ଭାରି କଷ୍ଟ
ଟଙ୍କା ପଇସାରେ ସ୍ପଷ୍ଟ
ନିଜ ମତ କରି ନଷ୍ଟ
ଦୁଷ୍ଟ ସାଜୁଅଛି ଶ୍ରେଷ୍ଠ
ମଦ ମାଉଁସରେ ଏ ଯୁବ ସମାଜ
ହେଉଛନ୍ତି ପଥଭ୍ରଷ୍ଟ ।
ଏଠି ଶୁଣିବ ନୂଆ ଖବର
ପାଣିରେ ଭାସେ ପଥର
ବିଧବା ପିନ୍ଧେ ସିନ୍ଦୁର
ଦୁର୍ଗନ୍ଧ କରେ ଅତର
ସ୍ନୋ ପାଉଡର ମୁହଁରେ ବୋଳି କି
ସତୁରୀ ଭାବେ ସତର ।