આપણી વચ્ચે,
આપણી વચ્ચે,
1 min
14K
ઊભા છે એમ કંઇ મૂંગા સવાલો આપણી વચ્ચે,
ચણી છે કોઇએ જાણે દીવાલો આપણી વચ્ચે.
નિરંતર જાય છે વધતું જ અંતર બેઉ છેડાનું,
સમય ઠેબે ચડ્યો છે સાવ ઠાલો આપણી વચ્ચે.
હવે 'મળવું'નો એક જ અર્થ 'બળવું' આપણા માટે,
હવે મીણબત્તીઓ થઇ ગઇ મશાલો આપણી વચ્ચે.
નથી સંપર્કના સેતુ સમું કંઇ રાખવાનું તો,
કરે છે આવ-જા શાની ટપાલો આપણી વચ્ચે?
પ્રતીક્ષાના પડાવે ક્યાં સુધી રોકાઇશું 'આતુર'?
પડ્યો પથરાઇને કોનો રસાલો આપણી વચ્ચે?