ଉଠ କଙ୍କାଳ

ଗଙ୍ଗା ଯାହାର ମସ୍ତକେ ଶୋଭା,

ପାଦ ଧୁଏ ଗୋଦାବରୀ।

ଆଜି ସେ ଉତ୍କଳ ହୋଇଛି କାଙ୍ଗାଳ,

ପାଲଟିଛି ହତଶିରୀ ।।

ତ୍ୟାଗ ତପସ୍ୟାର ଭୂମି ଏ ଉତ୍କଳ,

ସାକ୍ଷୀ ଅଛି ଇତିହାସ।

ବାର'ଶ ବଢ଼େଇ ପାଇଁ ଧର୍ମପଦ,

ସମୁଦ୍ରେ ଦେଇଛି ଝାସ ।।

ଏ ମାଟିର ବୀର ପାଇକ ଆଗରେ,

ନଇଁଛି ବ୍ରିଟିଶ୍ ମଥା।

ଦୟାନଦୀ ତୀର କହେ ଏ ମାଟିର,

ବୀରତ୍ୱର ମହାଗାଥା।।

ଧଉଳି ପାହାଡ଼ ରହି ଅଛି ସାକ୍ଷୀ,

ଏ ମାଟିର ସାହସର।

ହରାଇଛି ପ୍ରାଣ ହରାଇନି ମାନ,

ହୋଇନାହିଁ ନତ ଶିର।।

ବୀର ପ୍ରସବିନୀ ଉତ୍କଳ ଜନନୀ,

ଶ୍ରୀହୀନ ହେଲାଣି ଆଜି ।

ଉତ୍କଳମଣିଙ୍କ ସ୍ୱପ୍ନର ଓଡିଶା,

କେଉଁଠି ଯାଇଛି ହଜି ।।

ଗରିବ ଓଡ଼ିଆ ଚାକିରୀ ବିହୁନେ,

ଦାଦନ ଶ୍ରମିକ ସାଜେ ।

ଫେରିବାର ବାଟ ଚାହିଁ ବସି ବସି,

ମା'ର ପଣତ ଭିଜେ।।

ପେଟ ବିକଳରେ ମା' ଏଠି ବିକେ,

ନିଜର ପେଟର ଛୁଆ ।

ନିଜ ଶବ ନିଜ କାନ୍ଧରେ ବୋହି,

ଘୁରି ବୁଲନ୍ତି ଓଡ଼ିଆ।।

ଆଉଶକ୍ତି ନାହିଁ ଦେଖିବାକୁ ଭାଇ,

ନଗଡ଼ା ବା କାଶୀପୁର ।

ସ୍ଵଛ ଶାସନର ଦର୍ପଣେ ଦିଶେ,

ଦୁର୍ନୀତିର ଗନ୍ତାଘର ।।

ଆଉ କେତେଦିନ ଚେଇଁ ଶୋଇଥିବ,

ଉଠ ଉଠ କଙ୍କାଳ ।

ସମୟ ଆସିଛି ପ୍ରମାଣ ଦେବାକୁ,

ଆମେ ନୁହେଁ ଦୁର୍ବଳ ।।

ବାଜେ ରଣଭେରୀ ଧର ତରବାରୀ,

ଏବେ ଯୁଦ୍ଧର ବେଳ।

ଥମିଯାଉ ଯେତେ ଅନୀତି ଦୁର୍ନୀତି,

ଗର୍ଜିଉଠୁ ମହୀତଳ ।।

ଭୂମିକମ୍ପ ହେଉ ଗରଜୁ ଆକାଶ,

ଥରିଉଠୁ ରସାତଳ ।

ଚତୁର୍ଦ୍ଦିଗେ ବାଜୁ ବିଜୟ ଦୁନ୍ଦୁଭି

ବିଶ୍ୱରେ ପଡୁ ଚହଳ।।

ରାକେଶ ମିଶ୍ର

ଦୁରଭାଷ - 8420912545