ଉଭା ହେବେ ମାଆ ମହିମାମୟୀ
ଉଭା ହେବେ ମାଆ ମହିମାମୟୀ
ଆଶ୍ୱିନ ଆସିଛି ଧରାକୁ ଓହ୍ଲାଇ
ପାର୍ବଣ ଋତୁକୁ ସାଥିରେ ନେଇ
ଚଉଦିଗେ ସାଜସଜ୍ଜା ଚାଲିଅଛି
ଉଭା ହେବେ ମାଆ ମହିମାମୟୀ ।
ଶୁଭ୍ର କାଶତଣ୍ଡି ଅନାଇ ବସିଛି
ସ୍ୱାଗତ କରିବ ମାଆ ଦୁର୍ଗାଙ୍କୁ
ଶାନ୍ତ ସ୍ନିଗ୍ଧ ଜ୍ୟୋତ୍ସ୍ନା ଚନ୍ଦ୍ରମା ବିଛେଇ
ପ୍ରସନ୍ନ କରିବ ଜଗଦାତ୍ରୀଙ୍କୁ ।
ପାପ ବିନାଶିନୀ ଦୁର୍ଗତି ନାଶିନୀ
ଜଗତବାସୀଙ୍କ କଲ୍ୟାଣ ପାଇଁ
ମରତ ଭୂମିରେ ଅବତାର ନେବେ
ନାନା ଅସ୍ତ୍ରଶସ୍ତ୍ରେ ସଜ୍ଜିତ ହୋଇ ।
ଆଲୋକ ମାଳାରେ ପୂଜା ମଣ୍ଡପରେ
ମହିଷମର୍ଦ୍ଦିନୀ ପୂଜା ପାଇବେ
ଘଣ୍ଟ କାହାଳୀର ମଧୁର ସୁରରେ
ସରବେ ଭକ୍ତିରେ ନାଚିଉଠିବେ ।
ମନ୍ତ୍ର ଶ୍ଳୋକ ସ୍ତୁତି କର୍ଣ୍ଣରେ ବାଜନ୍ତେ
ଦୁଷ୍ଟଶକ୍ତି ସବୁ ହୋଇବେ ବଶ
ମାଆ ଜଗଦମ୍ବା ପାପକୁ ନାଶିବେ
ବୁଣିଦେବେ ଧରାବକ୍ଷରେ ହସ ।