ତୁମେ ଆସିଗଲା ପରେ

ଆଦ୍ୟ ଆଷାଢ଼ର ଶୁଭ ଲଗନରେ

ପ୍ରଫୁଲ୍ଲିତ ବସୁମତୀ

ମୌସୁମୀ ପରଶେ ଭିଜୁଅଛି ମାଟି

ପ୍ରଶମିତ ହୁଏ ତାତି ।

ମେଘ ଆଚ୍ଛାଦିତ ଆକାଶ ବକ୍ଷରେ

ଇନ୍ଦ୍ରଧନୁ ମନୋରମ

ସପ୍ତରଙ୍ଗ ତା'ର ଆହା କି ସୁନ୍ଦର

ହୃଦୟରେ ଭରେ ପ୍ରେମ ।

ରହି ରହି ଶୁଭେ ଘଡଘଡି ଶବ୍ଦ

ମନେ ସୃଷ୍ଟିକରେ ଭୟ

ବିଜୁଳି ଖେଳୁଛି ଲୁଚକାଳି ଖେଳ

ଚତୁର୍ଦ୍ଦିଗ ଜ୍ୟୋତିମୟ ।

ସୁଲୁସୁଲୁ ବାଆ ବୋହୁଅଛି ଧୀରେ

ଶିହରିତ କରେ ତନୁ

ବିରହି ପ୍ରେୟସୀ ଭୋଗୁଛି ବେଦନା

ହୃଦୟର ରାଜା ବିନୁ ।

ନିରସ ପାଦପ ହୋଇ ପଲ୍ଲବୀତ

ଧରାପୃଷ୍ଠ କୁସୁମିତ

ଶ୍ୟାମଳ ସୁନ୍ଦର ରୂପରେ ବିଭୋର

କବିପ୍ରାଣ ଆନନ୍ଦିତ ।

ଶୁଷ୍କ ସ୍ରୋତସ୍ୱିନୀ ଜଳପୂର୍ଣ୍ଣ ହୋଇ

ସାଗରକୁ ଛୁଇଁବାକୁ

ବନ୍ଧବାଡ଼ ଡେଇଁ ଯାଉଅଛି ବୋହି

ଜୟକରି ବିପଦକୁ ।

ଗହନ ବନରେ ଆନନ୍ଦ ମନରେ

ନୃତ୍ୟରତ ପିକକୁଳ

ତୃଷିତ ନେତ୍ରରେ ଭିଜି ପୀରତିରେ

ଧାବମାନ ମେଘମାଳ ।

ସାଧବ ବୋହୂର ଥିରି ଥିରି ଚାଲି

ନୟନରେ ଭରେ ତୃପ୍ତି

ମଣ୍ଡୁକର ନାଦ ନୀରବତା ଭାଙ୍ଗେ

ବିଚଳିତ ଅମା ରାତି ।

ବରଷାର ଧାରା ଗାଉଛି ସଙ୍ଗୀତ

ପ୍ରକୃତିର ବକ୍ଷପରେ

ମୌସୁମୀ ଗୋ କାହିଁ ଆନମନା ମହୀ

ତୁମେ ଆସିଗଲା ପରେ ।