ତୁମ ଲାଗି

ତୁମ ଲାଗି ସିନା ଆକାଶ ସୁନ୍ଦର

ଶାନ୍ତ ସୁନୀଳ ଦିଶେ

ତୁମ ଲାଗି ସିନା ଧରଣୀ ବକ୍ଷରେ

ସବୁଜିମା କ୍ଷେତ ହସେ ।

ତୁମ ଲାଗି ସିନା ବାଦଲ ସାଥିରେ

ଜହ୍ନ ଲୁଚକାଳି ଖେଳେ

ତୁମ ଲାଗି ସିନା ସାଗର ବୁକୁରେ

ଅସୁମାରି ଢେଉ ଦୋଳେ ।

ତୁମ ଲାଗି ସିନା ସୂର୍ଯ୍ୟ ଆତଯାତ

ଦିନପରେ ଆସେ ରାତି

ତୁମ ଲାଗି ସିନା ବନେ ଉପବନ

ଫୁଲଫୁଟେ ନାନା ଜାତି ।

ତୁମ ଲାଗି ସିନା ଗୋପାଳ ଓଠରୁ

ଝରେ ବଇଁଶୀ'ର ସ୍ଵନ

ତୁମ ଲାଗି ସିନା ଚୂତ ତରୁ ତଳୁ

ଶୁଭେ କୋଇଲିର ତାନ ।

ତୁମ ଲାଗି ସିନା ନର-ପଶୁ-ପକ୍ଷୀ

କୀଟ-ତରୁ-ଲତା ସୃଷ୍ଟି

ତୁମ ଲାଗି ସିନା ଝଡ଼ର ତାଣ୍ଡବ

ସବୁ କିଛି ନିଏ ଲୁଟି ।

ତୁମ ଲାଗି ସିନା କୁନି କୁନି ପିଲା

ବାଢ଼ୁଛୁ ପ୍ରଣତି ଆମେ

ସକଳ ସମାଜ ଶାନ୍ତିରେ ରୁହନ୍ତୁ

ସୁନ୍ଦର ଏ'ଧରା ଧାମେ ।