ତୁମ ଇଚ୍ଛା ପୂର୍ଣ୍ଣ ହେଉ

ନଶ୍ଵର ଶରୀର ମାଟିପିଣ୍ଡ ଘଟ ସରି ସରି ଯାଏ ଆୟୁ

ଭବସାଗରର ଉତ୍ତାଳ ତରଙ୍ଗେ ଥୟ ନୁହେଁ ପ୍ରାଣ ବାୟୁ

ତୁମେ ଏକା ସିନା ସାହାରା ହୋଇଲେ

                    ପାରି ହେବି ଯମ ଭୟୁ

ନଶ୍ଵର ଶରୀର ମାଟିପିଣ୍ଡ ଘଟ ସରି ସରି ଯାଏ ଆୟୁ ।।

ମଣିଷ ଜୀବନ ଦୁର୍ଲ୍ଲଭ ସଂସାରେ ଦେବେ ଅଲଭ୍ୟ ଏ ଦେହ

ଜନମ ନିଅନ୍ତି ଅମରେ ଲୋଭରେ ତେଜି ସରଗର ମୋହ

ଏ ଜନମଏକ ସାର୍ଥକ ଜନମ

                    ସତ୍ୟ ପଥେ ଜୀବ ଯାଉ

ନଶ୍ଵର ଶରୀର ମାଟିପିଣ୍ଡ ଘଟ ସରି ସରି ଯାଏ ଆୟୁ ।।

ଅମର୍ତ୍ତ୍ୟ ମଣ୍ଡଳୁ କ୍ଷରିତ ହୁଏରେ ପୀୟୂଷ ଆଶିଷ ଧାରା

ପୂର୍ବ ସୂରୀ ସୂର ମଙ୍ଗଳୁ ଆଶିଷେ ଏ ଜୀବନ ହେବ ତୋରା

ସତ୍ୟ ଧର୍ମ ପଥେ ସେବା କାର୍ପଣ୍ୟରେ

                     ମନ ମୋର ରହିଥାଉ

ନଶ୍ଵର ଶରୀର ମାଟିପିଣ୍ଡ ଘଟ ସରି ସରି ଯାଏ ଆୟୁ ।।

ସତ୍କାର୍ଯ୍ୟ ସତ୍ପଥ ପରମାର୍ଥ ମନ କରୁ ନିତ୍ୟ ଆଲୋଡିତ

ଏ ଜୀବନ ହେଉ ଶ୍ରୀ ପଦ ଚନ୍ଦନ ପବିତ୍ର ତୁଳସୀ ପତ୍ର

ସର୍ବ ଜ୍ଞାତା ଦାତା ଇଚ୍ଛାମୟ ଧାତା

                     ତୁମ ଇଚ୍ଛା ପୂର୍ଣ୍ଣ ହେଉ

ନଶ୍ଵର ଶରୀର ମାଟିପିଣ୍ଡ ଘଟ ସରି ସରି ଯାଏ ଆୟୁ ।।