ସଂଘର୍ଷମୟ ଜୀବନ

ଜନ୍ମ ଦିନଠୁ କାୟା ଛାୟା ଭଳି

ଜୀବନ ସହିତ

ଜଡେଇ ହୋଇଛି,

ଛୁଇଁ ଯାଇଛି ଯେ

ଦେହ ଦେହଳୀଠୁ

ନିଶ୍ବାସର ପ୍ରତି ଫର୍ଦ୍ଦ,

ପଦ ପଦବୀଠୁ

ସଂପର୍କର ସେତୁ -

ଜୀଇଁବାର କ୍ରିୟା

ତ୍ବରାନ୍ବିତ କରି

ଅଜାଡି ଦେଇଛି

ସଫଳତା ମଧୁ ସ୍ବାଦ,

"ସଂଘର୍ଷ " ସିଏ_

ପ୍ରତି ଜୀବନର

ଯୁଦ୍ଧ ଭେରୀ ତୂର୍ଯ୍ଯନାଦ।

"ଗଣ୍ଡ୍ଓ୍ବାନା" ଠାରୁ

କୁହ "ଜୁରାସିକ୍" ଅବା

"ଆର୍ଯ୍ୟାବର୍ତ୍ତ " ସାଗର ଗରଭେ

କ୍ରମିକ ସଂଘର୍ଷେ

ଚଳନ୍ତା, ଅଚଳ...

ସଭିଏଁ ତ ଏଠି

ନିରବଚ୍ଛିନ୍ନ ସଂଗ୍ରାମେ ରହି ଲିପ୍ତ,

କୋଉଠି ଭୂଗୋଳ

ନୁଆଁଉଛି ମଥା,

ଇତିହାସ କାହିଁ

ବଖାଣି ବସୁଛି..

" ଓ୍ବାଟାରଲୁ" ଠାରୁ

'ପଲାସୀ', 'ବକ୍ସାର'

ସବୁଠି କେବଳ ସଂଘର୍ଷ ସହିତ

ବିଜୟର ଦସ୍ତଖତ।

ସଂଘର୍ଷ କରୁଛି

ଦାଦନ ମୂଲିଆ,

ଯୋଡା ମୁଣ୍ଡ ଶିଶୁ,

ଦୁଷ୍କର୍ମ ପୀଡିତା

ଅବା ବିଷ ପିଆ -

ଋଣୀ ଚାଷୀ ଶେଷ ସ୍ବର,

ସଂଘର୍ଷ ବି କରେ

'ମାଲ୍ଯା' 'ନୀରବ'..

ସଂଘର୍ଷର ବିନା

ଲୁଚି ଗଲେ କେତେ

' ମହେଞ୍ଜୋଦାର'ରୁ

'ମାୟା ସଭ୍ୟତା'ର

ଯେତେ ଇମାରତ

ଗର୍ବୋନ୍ନତ ଦୁର୍ଗ ଗଡ।

ପ୍ରତି ଆବଶ୍ୟକ

ପୂର୍ତ୍ତିର ଲାଗି_

ରେସନ୍ କାର୍ଡ ଠୁ ସ୍ଥାନ ସଂରକ୍ଷଣ,

ବାର୍ଦ୍ଧକ୍ୟ ଭତ୍ତା ରୁ ଛାତ୍ର ବୃତ୍ତି ଋଣ,

ସବୁଠି ସଂଘର୍ଷ ଲହୁ ଲୁହ ଆପଣେଇ,

ଜଳ ଜଳ ଦିଶେ

ମନ ଆଇନାରେ,

ଗରୀବ କି ଧନୀ

ସଭିଏଁ ତ ଏଠି

ସଂଘର୍ଷ ରତ

ଛାତି ତଳେ ଛପା -

ଦୁଃଖ ବାରୁଦକୁ ଗଣ୍ଠିଲି ଟିଏ ବନେଇ।

ତେଣୁ ମୁଁ ରଖୁଛି କହି_

"ଲଢୁଛି, ଲଢିବି ତମାମ୍ ଜୀବନ....