ସ୍ମୃତି ହୁଏନା ଇତି

ସ୍ମୃତି ଯାଏ ଆସେ

ମନ କାନଭାସେ,

ହସ ଲୁହ ଦିଏ

ସାଥି ହୋଇ ରହେ ||

ସପ୍ତରଙ୍ଗ ବୁଣେ

ଥାଏ ମନ କୋଣେ

ଶିହରଣ ଭରେ

ଆପଣା କୁ ଝୁରେ ||

ବାଲି ଖେଳ ସ୍ମୃତି

ପୁଚି ଖେଳ ପ୍ରୀତି

ଜାମୁ ଗଛ କୋଳି

ତୋଳୁ ହୋଇ ମେଳି ||

ସୁଲୁସୁଲୁ ବାଆ

କାଗଜର ନାଆ

ଗାଆଁ ଦାଣ୍ଡେ ଭାସେ

ମନ ଆମ ହସେ ||

ରଜ ଦୋଳି ଖେଳ

ସାଙ୍ଗ ସାଥି ମେଳ

ପୋଡ ପିଠା ବାସ୍ନା

ପୁର ରାଶି ,ଛେନା ||

ଗ୍ରୀଷ୍ମେ ଟାଣ ଖରା

ପୋଖରୀ ପହଁରା

ଶୀତେ ଥଣ୍ଡା ବାଆ

ପୁହିଁ ହେଉ ନିଁଆ ||

ସ୍କୁଲ କଳା ପଟା

ଗୁରୁଜୀଙ୍କ ଦଣ୍ଠା

ଖାଇ ଛୁଟି ବେଳ

ସାଙ୍ଗ ସାଥି ଖେଳ ||

ସରସ୍ବତୀ ପୂଜା

ଭୋଗ ମୁଆଁ ,ଖଜା

ଫୁଲ ମାଳ ଗୁନ୍ଥା

ମାଳତୀର ପେନ୍ଥା ॥

ମାଆର ପଣତ

ବାପାଙ୍କ ଆକଟ

ଜେଜେମା' କାହାଣୀ

ବୁଢୀ ଅସୁରୁଣୀ ||

ଖଳା ପାଳ ଭାଡି

ଡେଉଁ ଥାଉ ଚଢି

ତାଳ ବଣ ସଜ

ହୋଲିର ମଉଜ ||

ଶଗଡର ଦୋଳି

ଗାଆଁ ଦାଣ୍ଡ ଧୂଳି

ତାମସା ଯାତରା

ବଜାର ପସରା ||

ଦିନ ଯାଏ ବତି

ଲିଭେ ନାହିଁ ସ୍ମୃତି

ଛାଇ ପରି ରହେ

ମନ ଝୁରୁ ଥାଏ ||

ସ୍ମୃତି ଅସରନ୍ତି

ହୁଏନା ସମାପ୍ତି

ଅତୀତର ଇତି

ବର୍ତ୍ତମାନ ସ୍ମୃତି ||

ସୁଶ୍ରୀ ସାହୁ

ମେଘାଳୟ