ମୋ ମା' ମାଟି

କେମିତି ବର୍ଣ୍ଣିବି ଜନମ ମାଟିକୁ

ପାଉ ନାହିଁ ଆଦି ଅନ୍ତ

ଜୀବନର ସବୁ ସୃତି ଅନୁଭୁତି

ତାହାରି କୋଳରୁ ପ୍ରାପ୍ତ ||

ଧୂଳି,ମାଟି,ପାଣି,ପବନ ମହକ

ଅଟେ ତାହାର ନିଆରା

ତା' ଧୂଳିଦାଣ୍ଡରେ ଲୋଟି ଗଲେ ଥରେ

ହୃଦ ତୃପ୍ତ ହୁଏ ପରା ||

ଭୂଗୋଳ ଇତିହାସେ ନାହିଁ ତା ନାଆଁ

ମନ କାଗଜରେ ଲେଖା

ସୁଶୀତଳ ଜଳ ମୃଦୁ ପବନରେ

ଜଳିଛି ଜୀବନ ଶୀଖା ||

ପୂର୍ବ ନଭେ ଯେବେ ଆଦିତ୍ୟ ଉଅଁନ୍ତି

ଧରି ଅମୃତ କଳସ

ଗାଆଁ ଶୋଭେ ମୋର ଦିଶଇ ସୁନ୍ଦର

ପୁଷ୍ପ ଚହଟଇ ବାସ ||

ଗାଆଁ ଦାଣ୍ଡ ମୋର ଅଙ୍କାବଙ୍କା ରାସ୍ତା

ଆଦ୍ୟ ମଙ୍ଗଳା ମନ୍ଦିରୁ

ବାଟରେ ପଡେ ମାହିମା ବତୀଘର

ଘଣ୍ଟ ଶୁଭେ ପାହାନ୍ତାରୁ ।।

ଚତୁଃପାର୍ଶେ ଦେବାଦେବୀଙ୍କ ଆଳୟ

ଏହିଠାରେ ଅବସ୍ଥାନ

ଶାଳରଗଡି ରେ ଦେବ ମହାଦେବ

ନୂଆଁ ପାହାଡେ ଶ୍ରୀରାମ ||

ଉତ୍ତରଦିଗେ କାମନା ଠାକୁରାଣୀ

ଅଟନ୍ତି ପ୍ରତକ୍ଷ ଦେବୀ

ଗାଆଁ ମୁଣ୍ଡେ ପୀତାବଳୀ ଠାକୁରାଣୀ

ମୋ ଗାଆଁର ଗ୍ରାମଦେବୀ ||

ଗାଆଁ ଶେଷେ ଅଛି ପାଠଶାଳା ଆମ

ଦୋଳ ମଣ୍ଡପ ପାଖରେ

ଦୋଳେ ଫଗୁ ଖେଳନ୍ତିି ରାଧାଗୋବିନ୍ଦ

ଲଉଡି ବାଡି ସାଥିରେ ||

ଗାଆଁ ମଝିରେ ଛିଡା ବଉଳ ଗଛ

ପୁଷ୍ପ ସୁବାଷ ମହକେ

ଦଣ୍ଡ,ନାଚ,ପାଲା ହୁଏ ସେହିଠାରେ

ଗାଆଁ ମୋର ଚମକେ ||

ସରୋବର ସବୁ ଅପରୂପ ଦିଶେ

ଲାଲ୍ ଶୁଭ୍ର କଇଁ ଭରି

ସତେକି ଓହ୍ଲାଇ ଆସିଛି ଧରାକୁ

ସରଗର ଅପସରୀ ||

ସଞ୍ଜ ନଇଁଗଲେ ଲୁଚି ଯାନ୍ତି ରବି

ନିମିଧା ପାହାଡ଼ କୋଳେ

ଘଣ୍ଟ,ଶଙ୍ଖ,ମୃଦଙ୍ଗ,ଖଞ୍ଜଣୀ, ଗିନି

ଶୁଭୁଥାଏ ତାଳେ ତାଳେ ||

ସୁଶ୍ରୀ ସାହୁ

ଶିଲଂଗ

ମେଘାଳୟ