ସ୍ବପ୍ନ ଓ ଜୀବନ

ଜୀବନେ ସପନ ସପନେ ଜୀବନ

ଅଙ୍ଗାଙ୍ଗୀ ଭାବେ ଜଡିତ

ସପନର ବିନା ଜୀବନ ଅଧୁରା

ଜିଇଁବାର ମୂଖ୍ୟ ସ୍ରୋତ ||

ଇନ୍ଧନ ଯୋଗାଏ ବଞ୍ଚିବାକୁ ସ୍ବପ୍ନ

ଦେଖାଏ ସେ ନୂଆ ରାହା

ଅତୀବ ସୁନ୍ଦର କରେ ଜୀବନକୁ

ପଥ ଚାଲିବାକୁ ସାହା ||

ସବୁଜ ସୁନ୍ଦର କରେ ଜୀବନକୁ

ଆଶାର ଆଲୋକ ଭରି

ବୁଣି ଦେଇଥାଏ ସପ୍ତରଙ୍ଗ ବୀଜ

ନଭ ଇନ୍ଦ୍ରଧନୁ ପରି ||

ପ୍ରଭାତେ ଅରୁଣ ହୁଅନ୍ତି ଉଦୟ

ଆନନ୍ଦ ଉଲ୍ଲାସ ଭରି

ସପନରେ ଡେଣା ଲାଗିଯାଇଥାଏ

ଯେହ୍ନେ ସରଗର ପରୀ ||

ନୀରସ ଜୀବନେ ସରସତା ଖେଳେ

ଆନନ୍ଦ ଲହରୀ ଭରି

ସପନ ହୃଦୟେ ପ୍ରସନ୍ନ ଖେଳାଏ

ବିଷଣ୍ଣ କୁ କରି ଚୋରି ||

ସମୟର ସାଥେ ସପନ ବଦଳେ

ବୟସର ତାଳ ଦେଇ

ମନ ପକ୍ଷୀ ଠାରେ ଡେଣା ଲାଗି ଯାଏ

ବାସ୍ତବତା ହଜିଥାଇ ||

ଘଡି଼କେ ସ୍ବପ୍ନ ଘୋଟକ ପରି ଧାଏଁ

ଲଗାମ ବିହୀନ ଅଶ୍ବ

କ୍ଷଣପ୍ରଭା ସେତ ଚପଳା,ଚଞ୍ଚଳା

ଅମାପ ମାପ ଆକାଶ ||

ସବୁ ଅଭିଳାଷା ହୁଏନି ପୂରଣ

ସ୍ବପନ ହୁଏନି ସତ

ତଥାପି ସପନ ସରେ ନାହିଁ କେବେ

ସୁପ୍ତ ହେଉ ବା ଜାଗ୍ରତ ||

ବିନା କରମରେ ସପନ ଅଲୋଡା଼

ଅଟେ ବାଲି ଘର ଭଳି

କ୍ଷଣିକେ ତୋଳେ ଭବ୍ୟ ସୁରମ ନଗ୍ର

କ୍ଷଣିକେ ହୁଅଇ ଧୂଳି ||

ଏମିତି ସପନ ଦେଖିବାକୁ ହେବ

ଯେ ନିଦ ନିଏ ଚୋରାଇ

ସେହି ସପନକୁ ସତ କରିବାକୁ

ଶୋଇବା ତ ଲୋଡା ନାହିଁ ||

ସୁଶ୍ରୀ ସାହୁ

ଶିଲଂଗ

ମେଘାଳୟ