ସମ୍ପର୍କ

ତମେ ଗୋଧୂଳି ସଞ୍ଜ ଦୂର ଦିଗବଳୟ

ମୁଁ କୁହୁଡ଼ି ତଳର ଶଶୀ

 ତମେ ପ୍ରୀତି ପାରାବାରେ ଅସରନ୍ତି ଢ଼େଉ

ମୁଁ ଶୀତ ଶିହରଣ ନିଶି !

ତମେ ପୁନେଇଁ ଚାନ୍ଦର ଜୋଛନା ମୁରୁଜ

ମୁଁ ଅମା ଅନ୍ଧାରୁଆ ରାତି

ତମେ ମୃଦୁ ମଳୟର ସୁଲୁ ସୁଲୁ ବାଆ

ମୁଁ ଚୋରା ଚଇତିର ଗୀତି !

ତମେ ପହିଲି ଫଗୁଣେ ରଙ୍ଗର ଅବିର

ମୁଁ ସାତ ରଙ୍ଗ ପ୍ରଜାପତି

ତମେ ହୃଦୟ କନ୍ଦରେ ସ୍ମୃତିର ଝରଣା

ମୁଁ ତମ ଅପରୂପ କାନ୍ତି !

ତମେ ବସନ୍ତ ବୁକୁରେ ବଉଳର ବାସ

ମୁଁ ଶରତର ଶୁଭ୍ର ଶଶୀ

ତମେ ଧାରା ଶ୍ରାବଣରେ ବଉଦର ଝଡ଼

ମୁଁ ଝଡ଼ ଶେଷ ଶାନ୍ତ ନିଶି !

ତମେ ନୀରବ ସକାଳ ସରସୀର ଫୁଲ

 ମୁଁ ବାଦଲ ଉହାଡ଼ ଜହ୍ନ

ତମେ ଆସବା ନ ଆସ ଜୀବନରେ ସାଥୀ

କେବେ ହଜିବନି ସ୍ମୃତି ଚିହ୍ନ !