ସମ୍ମାନରୁ ସଂସ୍କାର

ଗୁରୁ ଗୁରୁଜନ ଦେବତା ସମାନ,

           କରିବା ତାଙ୍କର ସମ୍ମାନ:

ଆଶୀର୍ବାଦ ପ୍ରାପ୍ତି ହେବା ସୁନିଶ୍ଚିତେ,

             ବଢିବ ନିଜର ମାନ::

ଦୁଃଖ ଦିଏ ପୀଡା ସୁଖ ଦିଏ ଖୁସି,

             ଜୀବନର ଦୁଇ ଦିଗ:

ଦୁଃଖରେ ଚାଲିଲେ ସୁଖ ଆସିଯାଏ,

            ଦିଗ ବଦଳାଇ ଆଗ::

ଆଜି ଧନ ଅଛି କାଲି ଚାଲିଯିବ,

           କରି ଦେଇଯିବ ଭିକାରୀ:

ଧନ ନୁଁହ ବଡ଼ ଆଜି ଦୁନିଆରେ,

          ସମ୍ମାନର ହେବା ପୂଜାରୀ::

ନିଜର ମାଆ ନିଜର ସମ୍ମାନ,

             ନିଜର ବି ଅଭିମାନ:

ଆତ୍ମଗର୍ବ ନୁଁହ ସମ୍ମାନର ଭାଷା,

             ନଷ୍ଟ କରେ ସ୍ୱାଭିମାନ::

ପିତା ମାତା ଭକ୍ତି ମୁକ୍ତି ସାଥେ ଶାନ୍ତି,

             ଗୁରୁ ପୂଜ୍ୟ ବନ୍ଦନୀୟ:

ପ୍ରଣାମ ଚରଣେ ସମ୍ମାନୀୟ ଗୁରୁ,

            ଗୁରୁ ଅଟେ ମାନନୀୟ::

ବିଶ୍ୱ ବ୍ରହ୍ମାଣ୍ଡରେ ଗୋଟିଏ ଈଶ୍ୱର,

             ସୃଷ୍ଟି ବଳିୟାନେ ସାହା:

ଦିନରାତି ହୁଏ କ୍ଷୁଦ୍ରକୁ ବୃହତ,

            କରିଥାନ୍ତି ଦେଇ ରାହା::

ସମ୍ମାନରୁ ପୁଣ୍ୟ ସମ୍ମାନରୁ ଧର୍ମ,

             ସମ୍ମାନରୁ ସମ୍ମାନୀୟ:

ଚଲା ପଥଟିକୁ କର କୁସୁମିତ,

             ତୁମେ ପ୍ରଭୁ ଦୟମୟ::

ଆଜି ଦୁନିଆରେ ସମ୍ମାନ ପାଉଛି,

              ଗର୍ବୀ ହିଂସ୍ର ଦୁଷ୍ଟନର:

ପୂଜା ପାଉଅଛି ଆସନେ ଆଦରି,

            କରି ନିତ୍ୟ ଅତ୍ୟାଚାର::

ମହେଶ୍ୱର ସାହୁ

ଗୋପୀବିନ୍ଧା, ବ୍ରାହ୍ମଣ ଗାଁ,

ବାଲେଶ୍ୱର(ଭଦ୍ରକ)