ଶିଶୁଟି ସୃଷ୍ଟିର ଉଷା
ଶିଶୁଟି ସୃଷ୍ଟିର ଉଷା
1 min
168
ଆଜିର ଶିଶୁଟି ହୋଇଥାଏ ଦିନେ
ସଂସାରର ଭବିଷ୍ୟତ,
ସରଳ ନିଷ୍ପାପ ମନଟିଏ ତା'ର
କରେ ସଦା ଆନନ୍ଦିତ ।
କପଟ ଛଳନା ଜଣା ନାହିଁ ତାକୁ
ନଥାଏ ବାଛ ବିଚାର,
ଟିକିଏ ସେନେହ ପାଇଲେ କାହାଠୁ
କରିନିଏ ଆପଣାର ।
ଯେତେ ଦୁଃଖେ ଥିଲେ ତା' ମୁଖ ଦର୍ଶନେ
ଫୁଟି ଉଠେ ଓଠେ ହସ,
ଶ୍ରମ ପୀଡ଼ା ଯେତେ ଦୂର ହୋଇ ଯାଏ
ଖୁସିର ହୁଏ ପ୍ରକାଶ ।
ପୁଅ ହେଉ ଅବା ଝିଅଟିଏ ସିଏ
ଦୁହେଁ ଅଟନ୍ତି ସମାନ,
ବଡ଼ ହୋଇ ଦିନେ ପରିବାର ସହ
ରଖିବେ ଦେଶର ମାନ ।
ପିତା ମାତା ସଙ୍ଗେ ଗୁରୁଜନ ମାନେ
କରିଥାନ୍ତି କେତେ ଆଶା,
ତେଣୁ ପ୍ରଭୁଙ୍କର ସକଳ ସୃଷ୍ଟିରେ
ଶିଶୁଟି ସୃଷ୍ଟିର ଉଷା ।