ସ୍ବାଧୀନତା

ଗୋଟିଏ ଟଙ୍କାର ଦାନା ଟିକେ ପାଇଁ

ଗରିବଟେ ବସି କାନ୍ଦୁଛି

ତଥାପି ସମସ୍ତେ ଗର୍ବରେ କହୁଛୁ

ଅଗଷ୍ଟ ପନ୍ଦର ଆସିଛି

ଗାଁ ଗାଁ ଗଳି କନ୍ଦିରେ ଆଜି ବି

ନିର୍ଭୟା ଚିତ୍କାର ଶୁଭୁଛି

ତଥାପି ସମସ୍ତେ ଗର୍ବରେ କହୁଛୁ

ଅଗଷ୍ଟ ପନ୍ଦର ଆସିଛି

ନିରୁପାୟ ଆଉ ଅସହାୟ ହେଇ

ଚାଷୀ ଆତ୍ମହତ୍ୟା କରୁଛି

ତଥାପି ସମସ୍ତେ ଗର୍ବରେ କହୁଛୁ

ଅଗଷ୍ଟ ପନ୍ଦର ଆସିଛି

ସାଇକେଲ ଆଉ ଖଟିଆରେ ଏଠି

ରୋଗୀ , ଶବ ବୁହା ହେଉଛି

ତଥାପି ସମସ୍ତେ ଗର୍ବରେ କହୁଛୁ

ଅଗଷ୍ଟ ପନ୍ଦର ଆସିଛି.

ସୁବାଷ ବୋଷର ଆତ୍ମା ଆଜି ଗୋଟେ

ପ୍ରଶ୍ନର ଉତ୍ତର ଚାହୁଁଛି

ରାଣୀ ଲକ୍ଷ୍ମୀବାଇ ଅନ୍ତରାତ୍ମା ଆଜି

କିଛି କହିବାକୁ ଚାହୁଁଛି

ଭଗତ ସିଂର ଆତ୍ମା ଆଜି କାହିଁ

ଚିତ୍କାର କରି କହୁଛି

ସତରେ କଅଣ ଗୋଟେ ଲୋକ ପାଇଁ

ଏ ଦେଶଟା ସ୍ୱାଧୀନ ହେଇଛି.

କୋଟି କୋଟି ଟଙ୍କା ଖର୍ଚ୍ଚ କରାଯାଇ

ମହା ସମାବେଶ ହେଉଛି

କୋଟି କୋଟି ଲୋକ ଭୋକରେ ମାରନ୍ତି

ତାଙ୍କ କଥା କିଏ ବୁଝୁଛି

ଯିଏ ଯାହା କହୁ ଛାତିକୁ ଫୁଲେଇ

ଅଗଷ୍ଟ ପନ୍ଦର ଆସିଛି

ସ୍ଵାଧୀନତା ଆଜି ପରାଧିନତାର

ଶିକୁଳିରେ ବନ୍ଧା ପଡିଛି

(ରଜତ କୁମାର ନାୟକ)