ସାଙ୍ଗଟିଏ
ସାଙ୍ଗଟିଏ
ସକାଳୁ ସକାଳୁ ଜନମ ଦିନରେ
ନିତ୍ୟକର୍ମ ସାରିଦେଇ
ଗୁଡୁଲି ଆମର ବାପା ବୋଉ ପାଦେ
ପ୍ରଣିପାତ କଲା ଯାଇ ।
ବାପାଙ୍କ ସାଥିରେ ମନ୍ଦିରକୁ ଯାଇ
ପୂଜିଲା ଭକତି ଚିତ୍ତେ
ପ୍ରଭୁଙ୍କୁ କହିଲା ଭଲ ମଣିଷଟେ
କରିଦେବ ସାଇଁ ମୋତେ ।
ଗୁରୁଜୀଙ୍କ କଥା ମନେ ହେଜି ସିଏ
ବାଡ଼ି ବଗିଚାକୁ ଗଲା
ଚାରା ଗଛଟିଏ ନିଜ ହାତେ ପୋତି
ମୂଳେ ପାଣିଟିକେ ଦେଲା ।
ସାନ ଭାଇ ସାଇ ପଚାରିଲା ଯାଇ
କଣ କରୁଅଛୁ ଦିଦି
କହିଲା ବୁଝାଇ କହିବି ନିଶ୍ଚୟ
ଧ୍ୟାନରେ ଶୁଣିବୁ ଯଦି ।
ଚାରାଟିଏ ଆଜି ଲଗାଇଲି ମୁହିଁ
ଯତ୍ନନେବି ପ୍ରତିଦିନ
ମୂଳେ ପାଣି ଦେବି ବାଡ଼ ଘେରାଇବି
ବଞ୍ଚାଇବି ତାର ପ୍ରାଣ ।
ଗୁରୁଜୀ କୁହନ୍ତି ଗଛ ଆମ ବନ୍ଧୁ
ଦେଇଥାଏ ଫୁଲଫଳ
ଖରାଦିନେ ଛାଇ ଦେଇଥାଏ ସେହି
ଚାରିଆଡେ ବଢି ଡାଳ ।
ଗଛ ଯୋଗୁଁ ବର୍ଷା ହୋଇଥାଏ ବୋଲି
ଚାଷବାସ ହୋଇପାରେ
ତା'ର ଚେରମୂଳ ମାଟିକୁ ଜାବୁଡି
ମାଟିକ୍ଷୟ ରୋକିପାରେ ।
ଆସବାବପତ୍ର ତିଆରିବା ପାଇଁ
କାଠପଟା ଦେଇଥାଏ
ଔଷଧ ଯୋଗାଏ ପୋଷାକ ଯୋଗାଏ
ଜାଳେଣି ବି ବାଣ୍ଟିଥାଏ ।
ଏତେ ଉପକାରୀ ଗଛଟିଏ ବୋଲି
ଲଗାଉଛି ଆଜି ମୁହିଁ
ଜୀବନରେ ଆମ ସାଙ୍ଗଟିଏ ସିଏ
କେବେ ହାଣିଦେବା ନାହିଁ ।