ରଫ୍ ଖାତା ଓ ମୋ ମାଆ

ଭାରି ବ୍ୟସ୍ତ କାର୍ଯ୍ୟରତ, 

   ଏକା ଏକା ପଣିଆ,

ସଢେ ଖାଲି ଘର କଣେ, 

   ସତେ କି ସେ ଅଳିଆ ।୧

କେଉଁ ଏକ ମୁଦଦିଆ 

   ଭଙ୍ଗା ଟିଣ ବାକ୍ସରେ,

କେତେ ଥିଲା ବହି ଖାତା, 

   ଅଛି ଇତିହାସରେ;

ସାହିତ୍ୟ ଭୂଗୋଳ ବହି

   ବଡ଼ ବଡ଼ ଗଣିତ

ଅପନ୍ତରା ଜାଗା ବେଶି

   ମନେ ପଡେ ନାହିଁ ତ!

ଭୂଗୋଳ ଇଂରାଜୀ ଆଉ

   ନାନା ବିଦ୍ୟାରତନ 

ତା ବିନା ଅଧୁରା ଥିଲା

  ବଡ଼ ହେବା ସପନ ।

ଅପନ୍ତରା ଟିଣ ବାକ୍ସ 

   ଆଉ କିଏ ଲୋଡିବ?

ଧୂଳିଧୂସରିତ ଗ୍ରାମେ

   ସମ୍ପର୍କ କେ ଜୋଡିବ?

ଆଧୁନିକ ଏ ଯୁଗରେ

   ସବୁ କିଛି ଡିଜିଟାଲ୍ 

ଅଲୋଡା ପୁରୁଣା କଥା

  ଯେତେ ହେଉ କ୍ଲାସିକାଲ୍ ।

ଗ୍ୟାରେଜରେ ପଡି ଥାଉ

   ଅସଜଡା ମୋଟର,

ବାର୍ଦ୍ଧକ୍ୟ ପୀଡିତା ମାତା

   ହାଟର ନା ଘାଟର?

    

ପରୀକ୍ଷା ସରିଲେ ଥରେ

   ରଫ ଖାତା ଫୋପାଡ,

ମାଆ ଥାଉ ଅନ୍ଧାରୀ ସେ

   ଭଙ୍ଗା କାନ୍ଥ ଉହାଡ ।