ରଙ୍ଗତୂଳୀ

ଅଢେଇ ଦିନର ଜୀବନରେ 

ଅନେକ ଅପାସୋରା ମୁହୂର୍ତ୍ତକୁ 

ବଦଳେଇବାକୁ ବାଧ୍ୟ ହୁଏ ଭାଗ୍ୟ

ସ୍ନେହ-ପ୍ରେମ, ଦୁଃଖ-ସୁଖ, ସାହସ-ଧୈର୍ଯ୍ୟର 

ମିଶ୍ରିତ ରଙ୍ଗତୂଳୀ ଧରି

ଚେଷ୍ଟା କରେ ଆଙ୍କିବାକୁ 

ନିଜ ଭିତରେ ଛୋଟ ପୃଥିବୀଟେ ।

ପ୍ରକୀର୍ଣ୍ଣ ପ୍ରକୃତି 

ହତ୍ୟା କରିବାକୁ ଆଗେଇ ଆସେ

ଦୁଇ ଆଖି ଦେଖୁଥିବା ନିରୀହ ସ୍ୱପ୍ନ !

ହଜିଯାଇଥିବା ଅତୀତ 

ଖୋଜୁଥିବା ଭବିଷ୍ୟକୁ 

ଅପେକ୍ଷା କରିବାର ଯନ୍ତ୍ରଣା

ଓଃ...! କି କଷ୍ଟଦାୟ ?

ସେ ମଣିଷ ହିଁ ଜାଣିଛି, ସହିଛି 

ହସିବାର ବାହାନାରେ ଅଜସ୍ର ଲୁହ ଲହୁ

ନିଗାଡି ଚାଲିଛି ।

ସ୍ୱାର୍ଥ ପୂର୍ଣ୍ଣ ପ୍ରଚୋଦନା

ଅବେଳକେ ପିଠିରେ ସ୍ନେହ, ସାହସର 

ଛାପ ଛାଡୁଥିବା ହାତମାନେ

ଆଗେଇ ଆସନ୍ତି ତଂଟି ଚିପିବାକୁ;

ଛାତିରେ, ପେଟରେ, ପିଠିରେ 

ଅପ୍ରକାଶିତ ପ୍ରତିବନ୍ଧକ ହୋଇ 

ଫୁଟିବାକୁ ।

ଝର୍କାରୁ ସୁନ୍ଦର ଦେଖା ଯାଉଥିବା

ସୁନ୍ଦରୀ ପୃଥିବୀରେ

ତରଙ୍ଗାୟିତ ଦୁର୍ଭେଦ୍ୟ

କାଳକ୍ରମେ ସ୍ୱାର୍ଥ ସଫଳତାର 

ଶେଷ ରାତିରେ ବିଦାୟ ନିଅନ୍ତି

ସ୍ୱାର୍ଥରେ ଉଚ୍ଛୁଳି ପଡୁଥିବା ସୁଖ

ସମ୍ପତ୍ତିର ବାସ୍ନାରେ ଚାରିପାଖେ 

ଉଡ଼ିବୁଲୁଥିବା ରୂପଧାରୀ ଭ୍ରମର

ଜରାଜୀର୍ଣ୍ଣ ପ୍ରେମିକ ହୋଇ ।।