ରଘୁନାଥ ବେଶ

ରାମଚନ୍ଦ୍ର ରଘୁନାଥ ପରଂବ୍ରହ୍ମ ଜଗନ୍ନାଥ

ଜଗନ୍ନାଥ ଧାମେ ତାର ସୁନ୍ଦରବେଶ

କୌଶଲ୍ୟା କୁମର ନାଥ ପିତା ଯାର ଦଶରଥ

ରଘୁନାଥ ବେଶେ ରାମ ରାଜାଧି ବେଶ

ରଘୁନାଥ ବେଶ ଧରିଣ

ଦର୍ଶନ ଦିଅଇ ଜଗା ଆନନ୍ଦେ ଜାଣ ll

ନବମୀଯେ ଗୁରୁବାର ଶୁକ୍ଳ ଶ୍ରବଣା ମକର

 ବୈଶାଖ ନକ୍ଷେତ୍ର ପୁଷ୍ୟl ପବିତ୍ର ଦିନ

ରାମ ଅଭିଷେକ ଦିନ ରାମଚନ୍ଦ୍ର ସିଂହାସନ

ରଘୁନାଥ ବେଶେ ଭକ୍ତ କରେ ଦର୍ଶନ

ବେଶଯେ ଭୂଷଣ ଶୃଙ୍ଗାର

ନାନା ଅଳଙ୍କାରେ କାନ୍ତି କି ମନୋହର ll

ବେଶ ପ୍ରବର୍ତ୍ତକ ସେତ ରାମାନୁଜାଚାର୍ଯ୍ୟ ସନ୍ଥ

ଥିଲେ ରାମଚନ୍ଦ୍ର ଦେବ ସେ ଗଜପତି

ପ୍ରାରମ୍ଭିଲେ ରାମବେଶ ନାମ ରଘୁନାଥ ବେଶ

ରାମ କୃଷ୍ଣ ଏକ ବିଷ୍ଣୁ ଜଗତପତି

ଶଙ୍ଖକ୍ଷେତ୍ରେ ସେହି କାଳିଆ

ସ୍ମୃତିରେ ଭାବର ବେଶ ଜଗାବଳିଆ ll

ରାମବେଶେ ଜଗନ୍ନାଥ ଲକ୍ଷ୍ମଣଯେ ବଳଭଦ୍ର

ଯୋଗମାୟା ବେଶେ ଶୋଭେ ସୁଭଦ୍ରା ମାତା 

ବାମେ ଶତ୍ରୁଘ୍ନ ଭରତ ଛତ୍ର ଧରି ବଳଭଦ୍ର

ଲଷ୍ମୀଙ୍କ ପ୍ରତିମା କୋଳେ ସ୍ୱରୂପ ସୀତା

ଋଷିମାନେ ରହି ଦକ୍ଷିଣେ

ବିରଳ ବେଶଯେ ଦେଖୁ ସନ୍ତୋଷ ମନେ ll

କାଷ୍ଠଯୁକ୍ତ ହସ୍ତ ପାଦ ସିଂହାସନେ ବାମପାଦ

ବୀରାସନେ ଧନୁ ତୂରୀ କରି ଧାରଣ

ହାତ ଯୋଡି ଜାମ୍ବବାନ ବିଭୀଷଣ ହନୁମାନ

ଚାମର ଅଙ୍ଗଦ ଧରି ଦଣ୍ଡାୟମାନ

ରଘୁନାଥ ବେଶ ଦର୍ଶନ

ଦେଖିବେ ଭାଗ୍ୟରେ ଥିଲେ ସେ ଭକ୍ତଜନ ll