ପ୍ରତି ଚାରିବରଷ ବିଶ୍ୱଉତ୍ସବ ବିଶେଷ
ପ୍ରତି ଚାରିବରଷ ବିଶ୍ୱଉତ୍ସବ ବିଶେଷ
କ୍ରିକେଟ୍ ବିଶ୍ୱକପ୍ ଆସେ, ପ୍ରତି ଚାରି ବରଷ,
ଆଣେ ମନେ ଆଉଥରେ, ସେ ନୂଆଁ ହରଷ ;
ହୋଇଛି ସମର୍ଥକଙ୍କ, ଅପେକ୍ଷାର ଶେଷ,
ଚାଲିବ ବିଶ୍ୱକପ୍ ପୁରା, ଦୀର୍ଘ ଦେଢ଼ ମାସ l (୧)
ଆସିଛି ଆଉଥରେ ନେଇ, ହସ ଖୁସି ଉଲ୍ଲାସ,
ଭାଗ ନେଇଛନ୍ତି ବିଶ୍ୱରୁ, ଆସି ଅନେକ ଦେଶ ;
ଏଇ ପାଳିକ ଦେଶ ଅଛନ୍ତି, ଗଣିଗଣି ଦଶ,
ଜିତିବ ସିଏ ଯାହାର ବେଶୀ, ଧୈର୍ଯ୍ୟ ଓ ସାହସ l (୨)
ପଡିଆରେ ଥିବେ ଲୋକ, ହୋଇ ନାନା ବେଶ,
କିଏ ପିନ୍ଧିଛି ମୁଖା ତ, କାହା ରଙ୍ଗୀନ କେଶ ;
କାହାର ନକଲି ଦାଢ଼ି ତ, କିଏ ମୋଡ଼ୁଛି ନିଶ,
ସମର୍ଥକ ଭାବେ ସଦା, ହାରିବାର ନାହିଁ ଲେଶ l (୩)
ହୋଇଲେ ଚଉକା ଛକା, ହେଉଥିବେ ଉଠ ବସ,
ହାରିବ କିଏ ଜିତିବ କିଏ, ବିଚାରି ତୁମେ କଷ ;
ଲାଗିଛନ୍ତି ରଖିବାକୁ ସବୁ, ନିଜ ଦେଶର ଯଶ,
କରିବେ କେମିତି ବିରୋଧୀ, ଯୋଜନାକୁ ନାଶ l (୪)
କେବେ ପିଚ୍ ମାଟିଆ ତ, କେବେ ଛୋଟ ଘାସ,
ଯେବେ ଉଇକେଟ୍ ମରୁଡ଼ି, ତେବେ ରନ୍ ର ଚାଷ ;
ସୁଇଂଗ୍ ପାଇଁ ପିନ୍ଧା ଜାମାରେ, ବଲ୍ ଧରି ଘଷ,
ସହଜ ନୁହେଁ ବୁଝିବା, ସ୍ପିନ୍ ବୋଲିଂର ଫାସ l (୫)
ହାରୁଥିଲେ ନିଜ ଦେଶ, ଯଦି ନାହିଁ ଆଉ ଆଶ,
କରନା ଅପଚୟ ପୁଣି, କରି ସମୟ ନିବେଶ ;
ହାରିଲେ ଆଖିରୁ ବହେ, ଲୁହ ଧାର ଠସଠସ,
ଜିତିଲେ ଦେଖିବ ତାଙ୍କ ଓଃ, ମୁଖରେ କି ହସ ! (୬)
ଯିଏ ଜିତୁ ଯିଏ ହାରୁ, କେହି ନ ହୁଅ ନିରାଶ,
ସଭିଙ୍କୁ ଶୁଭକାମନା, ଦିଅ ସଭିଏଁ ଅଶେଷ ;
ଖେଳ ତ ମନୋରଞ୍ଜନ, ଖୋଜ ନା କା'ର ଦୋଷ,
ହାରିଲେ ବି ଆଗେ ଯାଇ, ବିରୋଧୀ ସହ ମିଶ l (୭)
ଚଉଦ ଜୁଲାଇରେ ହେବ ଏ, ପ୍ରତିଯୋଗୀତା ଶେଷ,
ଅଛି ଆଶା ମନେ 'ଭାରତ', ଖେଳୁ ସେ ଦିବସ ;
କି ଜାତି, କି ଧର୍ମ କି, ବର୍ଣ୍ଣ ନିର୍ବିଶେଷ,
କଟେ ଏମିତି ଦିନ ଯେମିତି, ଉତ୍ସବ ବିଶେଷ l (୮)