ପ୍ରଶ୍ନବାଚୀ

ହୃଦୟରେ ହାତ ରଖି କୁହଥରେ ତୁମେ

ପ୍ରକୃତରେ ସ୍ବାଧୀନତା ପାଇଛେ କି ଆମେ ?

ହିଂସାଦ୍ୱେଷ,ମିଥ୍ୟାମୋହେ କବଳିତ ନର

ଅନାହାରେ ଜର୍ଜରିତ ଦେଶବାସୀ ମୋର ।

ଶିକ୍ଷା,ସ୍ୱାସ୍ଥ୍ୟ, ଶିଳ୍ପ,କୃଷି ପ୍ରଗତିର ପଥେ

ବେକାରୀଙ୍କ ସଂଖ୍ୟାବୃଦ୍ଧି ପାଉଅଛି କେତେ !

ନିର୍ଭୟରେ ରାଜରାସ୍ତେ ନାରୀ ଚାଲେ ନାହିଁ

ମାଂସଲୋଭୀ କାମାନ୍ଧକୁ ଡରୁଥାଏ ସେହି ।

ଭିନ୍ନ ଭିନ୍ନ ସରକାରୀ ଯୋଜନାର ସୂଅ

ତଥାପି ତ ଆତ୍ମହତ୍ୟା କରେ ଚାଷୀପୁଅ ।

ଅର୍ଥଲୋଭୀ ସରକାରୀ ବାବୁଙ୍କର ଛନ୍ଦ

ସାଧାରଣ ଜନତାର ମନମଧ୍ୟେ ଦ୍ବନ୍ଦ୍ୱ ।

ମୁଣ୍ଡ ଝାଳ ତୁଣ୍ଡେ ମାରି ମଜୁରିଆ ଭାଇ

ଜୀବନରେ ସୁଖ ସତେ ତା' ଭାଗ୍ୟରେ ନାହିଁ ।

ଦେଶମଧ୍ୟେ ଘରଢ଼ିଙ୍କି କୁମ୍ବୀରର ନୀତି

ସନ୍ତରାସବାଦୀମାନେ ଯାଇଛନ୍ତି ମାତି ।

ସ୍ବାଧୀନତା ଶବଦର ବାସ୍ତବତା ଛବି

ମନେ ମୋର ପ୍ରଶ୍ନବାଚୀ ଜଣାଉଛି ଦାବି ।