ଫେରିଯା ଶ୍ରାବଣୀ ଫେରିଯା

ନାହିଁ ସେ କାହାଣୀ ନାହିଁ ସେ ରଜା

ନାହିଁ ସେ ମଉଜ ନାହିଁ ସେ ମଜା

ମନ୍ଦାର ଫୁଟୁନି ମାଟି ବି ବାସୁନି

କେଶୁର ମାରୁନି ଗଜା,

ତୁ ଫେରିଯା’ ଶ୍ରାବଣୀ ଫେରିଯା’ । 0।

ବରଷା ରାଣୀଟା ବାସୁଥିଲା ଭାରି

ଛୋଟ ଛୋଟ ଦୁଷ୍ଟାମିରେ,

ବଢ଼ିଲା ବୟସ ଛାଡି ଦେଲା ଆଣି

ଭିନ୍ନ ଗୋଟେ ଦୁନିଆରେ ।

ଆଉ ପାରିବିନି ନିଜକୁ କନ୍ଦେଇ

ଗଢ଼ିବିନି ଆଉ କାଦୁଅ କଣ୍ଢେଇ

ମୋ କଣ୍ଢେଇ ଯାକ ତୁ ନେଇଯା’

ତୁ ଫେରିଯା’ ଶ୍ରାବଣୀ ଫେରିଯା’ ।୧।

ସମୟ ସାଥିରେ ସନ୍ଧିଟିଏ କରି

ସପନ ଯାଇଚି ଭୁଲି,

ସାରୁ ପତରରେ ପ୍ରଜାପତି ଧରା

ବେଳ ବି ଗଲାଣି ଚାଲି ।

ମିଛ ବାହାଘର ବର କନିଆଁ

ମିଛି ମିଛି ଭୋଜି ମିଛ କୁଣିଆ

ଭୁଲିଯା’ ସେସବୁ ଭୁଲିଯା’

ତୁ ଫେରିଯା’ ଶ୍ରାବଣୀ ଫେରିଯା’ ।୨।

ଦେବପ୍ରକାଶ ସାହୁ