ପଦୁଅଁ
ପଦୁଅଁ
କୋଟିପ୍ରାଣେ ପୁଲକ ଦେଉ ପଦୁଅଁ l
ଆନନ୍ଦ ଖେଳେ ମନେ ଦେଖି ତୋ ମୁହଁ ll
ଅତି କୋମଳ ହେତୁ କମଳ ନାମ l
ପଙ୍କଜ ନାମ ଯେଣୁ ପଙ୍କୁ ଜନମ ll
କମଳିନୀ ପ୍ରିୟ ତୋ ନାମ କମଳ l
ସ୍ଥିର ଜଳ ମଧ୍ୟରେ ଜନମ ତୋର ll
ସର୍ବଦେବତା ପ୍ରିୟା ଜୀବନ ଧନ୍ୟ l
ଦିନକର ଅଟନ୍ତି ତୋହର ପ୍ରାଣ ll
ଦିବାକରଙ୍କ କର ପରଶି ଗଲେ l
ଉକୁଟି ଉଠେ ହସ ତୋ ମୁଖେ ଭଲେ ll
ଅସ୍ତମିତରେ ମୌନେ ମୁଖ ଶୁଖଇ l
ଅପଲକେ ରହୁ ତୁ ପ୍ରଭାତ ପାଇଁ ll
ଉଦୟ କାଳେ ମୁଖେ ଶିଶିର ବିନ୍ଦୁ l
ସତେକି ଜିଣୁଥାଏ କୋଟିଏ ଇନ୍ଦୁ ll
ସୂର୍ଯ୍ୟ କିରଣେ ଦିଶେ ମୋତି ପ୍ରାୟେକ l
ପୁଷ୍ପଙ୍କ ମଧ୍ୟେ ରାଣୀ ତୁହିଯେ ଏକ ll
ଭ୍ରମରେ ପଡ଼ି ଭ୍ରମରେ ଭ୍ରମନ୍ତି ପାଶେ l
ସୁସ୍ୱାଦୁ ମଧୁ ତୋର ପାନର ଆସେ ll
କୋଳାହଳ କରନ୍ତି ଯେହ୍ନେ ମୁରଲୀ l
ବାଉ ଅଛନ୍ତି ସତେ ଶ୍ରୀ ବନମାଳି ll
ତୋ ବିନା ପୂଜା ପୂର୍ଣ୍ଣ ହୁଅଇ ନାହିଁ l
ଜାତୀୟ ପୁଷ୍ପ ହେଲୁ ତୁ ସେଥିପାଇଁ ll
ଜାତି ଧରମ ବର୍ଣ୍ଣ ନିର୍ବିଶେଷରେ l
ଗ୍ରହଣ କରିଥାନ୍ତି ଅତି ଆଦରେ ll
ଏମନ୍ତ ଦେବତା କେ ଅବା ଅଛନ୍ତି l
ପଦୁଅଁ ବିନା ପୂଜା ସେ ପାଉଛନ୍ତି ll
ସର୍ବ ମଣ୍ଡଳେ ସାର ପଦ୍ମ ମଣ୍ଡଳ l
ସେଠାରେ ବିରାଜନ୍ତି ଦେବତା ସାର l
ହୁଅନ୍ତୁ ଲକ୍ଷ୍ମୀ ଅବା ସେ ନାରାୟଣ l
ଆଉ ଦେବତା ଛନ୍ତି ଯେତେକ ଜଣ ll
ସଭିଏଁ ପଦ୍ମ ପ୍ରିୟ ଘେନନ୍ତି କରେ l
ବାସ କରନ୍ତି ନିତ୍ୟ ପଦ୍ମ ପୁଷ୍ପରେ ll
କି ଗୁଣ ବଖାଣିବି ରେ ପଦ୍ମ ତୋର l
ପୁଷ୍ପଙ୍କ ମଧ୍ୟେ ଅଟୁ ତୁହିଟି ସାର ll
ତେଣୁ ତୋର ସୁରକ୍ଷା ନାଗଙ୍କ ଦ୍ୱାରା l
ନାରାୟଣ କରିଲେ ସତ୍ୟରେ ପରା ll
ତୋ ଗୁଣ ଗାଇଛନ୍ତି ଲେଖକ କବି l
ଲେଖନୀ ଚଳାଇଲେ ତୋ କଥା ଭାବି l
ଉପମା ଅଳଙ୍କାର କରିଲେ ଖଞ୍ଜା l
ଜଗତେ ଉଡ଼ାଇଲେ ପଦୁଅଁ ଧ୍ୱଜା ll