ଓଟ
ଓଟ
1 min
230
ମୁହଁ ଟେକି ଉପରକୁ
ଓଟ ଚାଲୁଥାଏ,
ତଳେ ଘାସ ପତରକୁ
ଲୋଭକରି ଖାଏ ।
ଚାହାଣି ତା' ଅନୁରାଗ
ସତ୍କାର ବଡିମା,
ତା' ଦୃଷ୍ଟିରେ ସବୁ ନୀଚ
ଚାହେଁ ଡିମାଡିମା ।
ଉପରକୁ ସାଧାସିଧା
ସରଳ ଜାତୀୟା,
କୁଜରେ ଭରଇ ଖାଦ୍ୟ
ଚରଣ ଚୁଟିଆ ।
ଡେଙ୍ଗାଗୋଡ଼ ତଳେ ବାଲି
କାଦୁଆକୁ ଛେଳି,
ପାଣିକୁ ପଶେନି ଜମା
ନେଲେ ଠେଲି ପେଲି ।
ଖାଇପିଇ ସେଇଠାରେ
ମଳତ୍ୟାଗ କରେ,
ପେଟସଫା କରିଦିଏ
ପାଣି ପିଇଭରେ ।
ଚେଇଁ ଶୋଇ ଦେଖେ ବଡ଼
ଦାର୍ଶନିକ କବି,
ନିର୍ମଳ ଭାବମୂର୍ତ୍ତିର
ଆଙ୍କୁଥାଏ ଛବି ।
ରଡିକଲେ ଘଡ଼ଘଡ.. .
ଗଧ ଠାରୁ ହୀନ,
ଅଭିନୟ ବିଜ୍ଞାପନ
କରିକାଟେ ଦିନ।
ଖାଇ ଶୋଇ ବୁଲି ଚାଲି
ଜାହାଜ ସମାନ,
ଓଟ ପରି କିଛି ଲୋକ
ଭାବନ୍ତି ମହାନ ।