ନବାଙ୍କ ବେଶ

ପ୍ରତି ଅଙ୍ଗେ ଫୁଲ ବେଶ ପ୍ରଭୁଙ୍କ ନବାଙ୍କ ବେଶ

ଗେଣ୍ଡୁ ମଣ୍ଡା ଫୁଲ ମାଳେ କୁସୁମ ବେଶ 

 ପୂର୍ବ ମକର ସଂକ୍ରାନ୍ତି ଧନୁ ମାସ ଅନ୍ତ ଇତି

 ଉତ୍ତରାୟଣରେ ରବି ଖୁସିର ବେଶ

ସର୍ବ ଶୁଭା ଶୁଭେ ସ୍ଵାଗତେ

ଧରଣୀ ପୃଷ୍ଠରେ ଉଷ୍ମ ଆଭା ଆଗତେ ll

ଚିତା ଗୁଣା ଶ୍ରୀ ପୟର କର ପଲ୍ଲଵ ଅଧର

ଗେଣ୍ଡୁ ଫୁଲମାଳେ ବେଶ ଯେ ପ୍ରଦର୍ଶିତ

ଶଙ୍ଖ ମକର କୁଣ୍ଡଳ ଚକର ହଳ ମୂଷଳ

କଇଁଥ ଅଠାରେ ସୋଲ ସେ ସୁସଜ୍ଜିତ

ଚାଉଳ ଫୁଲର ମେଳଣ

ଶୋଭେ ଗେଣ୍ଡୁଫୁଲ ତାର ସାରା ଚଟାଣ ll

ପ୍ରଭୁ ମଦନ ମୋହନ ଆସି ରତ୍ନ ସିଂହାସନ

ମାଗେ ଆଜ୍ଞାମାଳ ସିଏ ମଧୁସୂଦନ

ପ୍ରଭୁ ଆଜ୍ଞାମାଳ ପାଇ ଦେବ ପରିକ୍ରମା ପାଇଁ

ଚାରିଥର ଘୂରେ ରତ୍ନ ସେ ସିଂହାସନ

ପ୍ରଭୁଯେ ମଦନ ମୋହନ

ମନ୍ଦିର ନବାଙ୍କ ବେଢା ଯେ ପ୍ରଦକ୍ଷଣ ll

ପ୍ରବର୍ତ୍ତକ ଏ ବେଶର ଚୈତନ୍ୟ ଦେବ ଭକ୍ତର

ଭକ୍ତର ଠାକୁର ସିଏ ଜଗଦ୍ଦେଶ୍ୱର

ଶୀତର କୁସୁମ ଫୁଲ ଆତ୍ମହରା ଦିଗପାଳ

ଆନନ୍ଦେ ଅର୍ପଣେ ପ୍ରଭୁ ଫୁଲର ହାର

ନବାଙ୍କ ବେଶକୁ ଦର୍ଶନେ

ସମର୍ପିତ ହୁଏ ଭକ୍ତ ସନ୍ତୋଷ ମନେ ll