ନୈତିକତା ପ୍ରେରଣା ମାତା ପିତା

ପିତାମାତାଙ୍କର ସନ୍ତାନ ଉପରେ

ରହିଛି ସଦା ଆଶିଷ,

ଜନମ ପରଠୁ ଆଦରେ ପାଳନ୍ତି

ଦୁହିଁଙ୍କ ଦାନ ଅଶେଷ ।୧।

ନିଜେ ଦୁଃଖ ସହି ସୁଖ ଦେବାପାଇଁ

ସଦା କରନ୍ତି ପ୍ରୟାସ,

ମନରେ ସନ୍ତୋଷ ପାଆନ୍ତି ଦେଖିଲେ

ସନ୍ତାନ ଓଠରେ ହସ ।୨।

ମାତା ସନ୍ତାନର ପ୍ରଥମ ଗୁରୁମା

ଦିଅନ୍ତି ଉତ୍ତମ ଶିକ୍ଷା,

ପିତା ସବୁ ବେଳେ ବୁଝାନ୍ତି, କିପରି

ବିପଦୁ ପାଇବ ରକ୍ଷା ।୩।

ବିଦ୍ୟାଳୟ ନେଇ ପାଠ ପଢିବାକୁ

ଗୁରୁଙ୍କ ପାଶେ ଛାଡନ୍ତି,

ବଡ ହୋଇ ଦିନେ ଯଶ ସେ ରଖିବ

ଆଶା ମନେ ରଖିଥାନ୍ତି ।୪।

ସୁଖରେ ଦୁଃଖରେ ପାଶେ ଠିଆ ହୋଇ

ଦିଅନ୍ତି ମନେ ସାହସ,

ନିଜ ସନ୍ତାନର ଦୁର୍ବଳତା କେବେ

କରନ୍ତି ନାହିଁ ପ୍ରକାଶ ।୫।

ପିତା ସ୍ବର୍ଗ ଠାରୁ ବଡ ଆମ ପାଇଁ

ମାତା ଧରଣୀ ଠୁ ବଳି,

ତାଙ୍କ ପାଦ ପଦ୍ମେ କୋଟି ପ୍ରଣିପାତ

ଭକ୍ତିରେ ଦିଏଁ ମୁଁ ଢାଳି ।୬।