ମୁଁ ଝାଡୁଦାର
ମୁଁ ଝାଡୁଦାର
ମୁଁ ଝାଡୁଦାର ,
ଦୁନିଆଁ ରହିବ କିପରି ସଫା ସୁତର
ତାର ରଖିଥାଏ ମୁଁ ଖବର
ଲୋକମାନଙ୍କର ବାତାବରଣକୁ ପରିଷ୍କାର କରିବାକୁ ଯାଇ
ମୁଁ ନିଜେ ହୋଇଯାଏ ଅପରିଷ୍କାର ।
କାହାର ଅଇଁଠା ପତ୍ର ତ , ପୁଣି କାର ପାଦତଳର ଧୂଳି ଧୂସର ,
ସବୁକୁ ବିନା ଦ୍ଵିଧାରେ କରିଥାଏ ମୁଁ ପରିଷ୍କାର ।
ରାସ୍ତା କଡର ନାଳ ନର୍ଦମାର ଦୁର୍ଗନ୍ଧ ଭିତରେ
ହାତରେ ଝାଡ଼ୁମୁଠା ଧରି,
କର୍ତ୍ତବ୍ୟ ପଥରେ ହୁଏ ମୁଁ ଆଗଭର,
ସଞ୍ଜ ରୁ ସକାଳ
କାରଣ ମୁଁ ଗୋଟେ ଝାଡୁଦାର ।
ଜାଣିନି ଏହା ମୋର ସୌଭାଗ୍ୟ କି ଦୁର୍ଭାଗ୍ୟ
ଅବା କେଉଁ ଜନ୍ମର କର୍ମଫଳ
ଯାହା ବନାଇଦେଇଛି ମତେ ଏକ ଝାଡୁଦାର ।
ତଥାପି ଏ ଦୁନିଆଁ ମତେ କରେ ତିରସ୍କାର
କାରଣ ମୁଁ ପରା ଗୋଟେ ଝାଡୁଦାର ।
ଠିକଣା ମୋର ଅଳିଆର କୁଢ଼ , ମୁଁ ଗୋଟେ ଝାଡୁଦାର ।
ପିଲାଛୁଆଙ୍କ ଠିକଣା ମୋର ସମାଜରେ ପରିଗଣିତ ହୁଏ ଯେ ,
ବାପା ତାର ଗୋଟେ ଝାଡୁଦାର
ତାଙ୍କର କି ଅଧିକାର ବଡ଼ଲୋକ ଘର ପିଲାଙ୍କ ସାଥେ ମିଶି ଖେଳିବାକୁ ଖେଳ ।
ପାଇଖାନା ଠୁ ଆରମ୍ଭ କରି ପାର୍ଲ୍ୟାମେଣ୍ଟ ଯାଏ
ଡାକ୍ତରଖାନା ଠୁ ଆରମ୍ଭ କରି କଚେରୀ ଘର ଯାଏ
ସବୁଠି ଗୁରୁତ୍ୱପୂର୍ଣ ଭୂମିକା ମୋର ,
ମୋ ବିନା ସବୁକିଛି ରହିଯାଏ ଅପରିଷ୍କାର
ହଁ ମୁଁ ଗୋଟେ ଝାଡୁଦାର ।
ଏତେ ପରିଶ୍ରମ କରି ମଧ୍ୟ
ସ୍ୱଳ୍ପ ବେତନରେ ଚଳେ ମୋର ପରିବାର,
ତଥାପି ମନରେ ଦୁଃଖ ନାଇଁ ମୋର
ପରିଚୟ ଦେବାକୁ ଯେ, ''ମୁଁ ଗୋଟେ ଝାଡୁଦାର'' ।
ରୋଜା ପଣ୍ଡା
ପୂର୍ଣ୍ଣାନନ୍ଦ ଭବନ
ନେତାଜୀ ନଗର, ମଧୁପାଟଣା
କଟକ-753010
E Mail-roja.saumya@gmail.com