ମୋ ଗାଆଁ
ମୋ ଗାଆଁ
କେତେ ଯେ ସମୟ ବହିତ ଗଲାଣି
ମହାକାଳ ପ୍ରବାହରେ ।
କାହିଁ କେତେ କାଳୁ ଜନ୍ମସ୍ଥଳୀ ମୋର
ବିରାଜିତ ଏ ଧରାରେ।।୧
ଯା'ର ପାଦ ସଦା ଧୋଇ ଦେଉଥାଏ
ଉତ୍କଳର ମନ୍ଦାକିନୀ ।
ପ୍ରକୃତି ଲଳନା କେଳିନିକେତନ
ସର୍ବ ସୁଷମାର ଖଣି ।।୨
ଶସ୍ୟ ସମ୍ପଦରେ ଭରପୁର ସଦା
ମୋର ଗାଆଁ ବିଲମାଳ ।
ମୋ ଗ୍ରାମ ତୋଟାରେ ବସନ୍ତରେ ଶୁଭେ
କୋଇଲି ପଞ୍ଚମ ସ୍ୱର।।୩
କବି ଜଗନ୍ନାଥ ମୋ ଗ୍ରାମର ସୁତ
ଅଦ୍ଵିତୀୟ କବିବର ।
ଲେଖନୀ ମୁନରେ ଝରାଉ ଅଛନ୍ତି
ଅନେକ କାବ୍ୟ ସମ୍ଭାର।।୪
ମା ବ୍ରାହ୍ମଣୀ ଦେବୀ ଛତ୍ରଛାୟା ତଳେ
ଗ୍ରାମ ମୋର ସୁରକ୍ଷିତ ।
ପର୍ବ,ପର୍ବାଣୀର ପାଳନେ ସଭିଏଁ
ହୋଇଥାନ୍ତି ଏକତ୍ରିତ।।୫
ଆଜିର ଯୁଗରେ ଏକତା ଅଭାବ
ଦେଖାଯାଏ ଗ୍ରାମେ ଗ୍ରାମେ ।
ମୋ ଗ୍ରାମରେ କିନ୍ତୁ ଏକତାର ମନ୍ତ୍ର
ପ୍ରତିଫଳେ ଅବିରାମେ ।।୬
ସରଗୁ ସୁନ୍ଦର ସୁଧାରୁ ମଧୁର
ଶାନ୍ତିର ଏ ତପୋବନ ।
ଯା' ଶାକ ତଣ୍ଡୁଳ ମାଟି ବାୟୁ,ଜଳ
ଗଢ଼ିଛି ମୋର ଜୀବନ ।।୭
ବୀର ପ୍ରସବିନୀ ମୋ ଗ୍ରାମ ଜନନୀ
ପଲ୍ଲୀକୁ କରେ ଗର୍ବିତ ।
ତାର ପୁତ୍ର ହୋଇ କୃଷକ, ସୈନିକ
ଦେଶ ସେବାରେ ଅର୍ପିତ ।।୮
ଯେତେ ଦିନ ମୁହିଁ ରହିବି ମହୀରେ
ରଖିବି ତାହାରି ନାମ ।
ବିଶ୍ୱ ଦରବାରେ ଚମକିବ ଦିନେ
ଚଣ୍ଡିମଙ୍ଗଳ ସୁନାମ ।।୯