ମନେପଡେ ପିଲାଦିନ

ନିଦାଘର ତାତି ଅସହ୍ୟ ହେଉଛି

ଶୀତଳତା ଲୋଡ଼ା ବୋଲି

ତିନିଜଣ ସାଙ୍ଗ ନଈକୂଳେ ଯାଇ

ପହଞ୍ଚଲେ ଚାଲି ଚାଲି ।

ନଈର ଶୀତଳ ଜଳରେ ଗାଧୋଇ

କରୁଛନ୍ତି ଖୁସିମଜା

ଖରାରେ ମଳିନ ଶରୀର ତାଙ୍କର

ଲାଗୁଅଛି ଟିକେ ତାଜା ।

କାହିଁ ଡରୁଅଛୁ ପାଣିକୁ ସାଙ୍ଗରେ

ମନଭରି ଗାଧୋଇବା

କିଛି କ୍ଷଣ ପାଇଁ ସୂର୍ଯ୍ୟଙ୍କ ତେଜକୁ

ମନରୁ ପାଶୋରିଦେବା ।

କହି କହି ଜଳ ସଢେଇରେ ନେଇ

ଅନ୍ୟ ସାଙ୍ଗ ଉପରକୁ

ଢାଳିଦେଇ ପୁଣି ଖୁସି ହେଉଛନ୍ତି

ପାଣି ସାଥେ ଖେଳିବାକୁ ।

ଆଖିରେ ଦେଖିଲି ତାଙ୍କରି ଖୁସିକୁ

ମନେପଡେ ପିଲାଦିନ

ଅତୀତର ସେଇ ନିଆରା ସମୟ

ଅଭୂଲା ସେ ସ୍ମୃତିଚିହ୍ନ ।

ବୋଉଙ୍କ ଆକଟ ବାପାଙ୍କର ଗାଳି

ନଥିଲା ମନରେ ଡର

ନଥିଲା ଭାବନା ଦୁଃଖ କି ଯାତନା

ସୁଖ ଥିଲା ଆପଣାର ।