ମିଠା ସପନ
ମିଠା ସପନ
ସପନେ ଦେଖିଲି ଗାଧୋଇବା ପାଇଁ
ନଈକି ଯାଇଚି ମୁହିଁ
ନଈକି ଦେଖିଲି ଆଚମ୍ବିତ ହେଲି
ଟୋପେ ବୋଲି ପାଣି ନାହିଁ
ପାଣିତକ ସବୁ ପାଲଟିଛି ମହୁ
ବହୁଛି ମହୁର ସୁଅ
ଭାସୁନାହିଁ ଫେଣ ଭାସୁଛି ଯେ' ଫେଣି
ଭାସୁଅଛି ଗୁଆ ଘିଅ ।
ପଡ଼ିଲା ନଜର ଟିକିଏ ଦୂରକୁ
ଭାସୁଛି ଗୋଟିଏ ଭେଳା
ଭେଳା ଦେଖିବାକୁ ଗଲି ମୁଁ'ପାଖକୁ
ମନ ଖୁସି ହେଇଗଲା
ଝିଲାପିରେ ଗଢ଼ା ଭେଳାରେ ଲାଗିଛି
ଛେନା ମୁଡ଼ୁକିର କାତ
ବସି ପଡ଼ିଲି ମୁଁ ' ସେ ଭେଳା ଉପରେ
ଜୋରରେ ଚ଼ାଲିଲା ସେ'ତ ।
ପହଞ୍ଚିଲି ଯାଇ ରାଜ ମହଲରେ
ମିଶ୍ରିରେ କାନ୍ଥ ତିଆରି
କେଉଁଠାରେ ଥିଲେ ଦୂତଗଣ୍ଡେ ଆସି
ନେଇଗଲେ ମୋତେ ଧରି
ଜେମା ବସିଥିଲେ ଖଜା ସିଂହାସନେ
ଗଜାର ମୁକୁଟ ପିନ୍ଧି
ତାଙ୍କ ଆଦେଶରେ ଦୂତ ମାନେ ମୋତେ
ପକାଇଲେ ପୁଣି ବାନ୍ଧି ।
ରାବିଡ଼ି ଖାଲରେ ଫୋପାଡ଼ି ଦେଲେ ସେ'
ଢ଼ାଳିଲେ ଉପରେ ସିରା
ରସଗୋଲା ବମ୍ ମାରି ମାରି ମୋତେ
କରିଦେଲେ ଦରମରା
ଆଁ' କରିଦେଲି ପାଟିରେ ପଶିଲା
ବଡ଼ବଡ଼ ରସଗୋଲା
ସକାଳ ହେଲାଣି ଉଠିପଡ଼ ବାବୁ
ମାଆ ଆସି ଡ଼ାକିଦେଲା ।