ମାଣବସା ବନ୍ଦନା

ଧନ ସୌଭାଗ୍ୟ ଓ ଐଶ୍ୱର୍ଯ୍ୟଦାୟିନୀ

ମାଆଗୋ ତୋ ପଦେ ନମନ,

ଭକତି ଭାବରେ ଆବାହନ କରେ

ଗ୍ରହଣ କର ପୂଜନ ।

ବିଷ୍ଣୁ ପାଟରାଣୀ ଆଦର୍ଶ ଘରଣୀ

ବୈକୁଣ୍ଠ ଧାମ ଗୌରବ,

ତୁମ ସଙ୍ଗ ପାଇ ପାଳନ୍ତି ସଂସାର

ନାରାୟଣ ଶାନ୍ତ ଭାବ ।

ତୁମେ ଅଟ ସବୁ ଗୃହିଣୀ ଆଦର୍ଶ

ଶୁଦ୍ଧ ହୃଦୟର ମାତ,

ଯେଉଁ ଗୃହେ ଦେଖ ସ୍ଵଚ୍ଛତାର ଚିହ୍ନ

ବିଜେ କର ହୋଇ ପ୍ରୀତ ।

ଜଗତର ମାତା ତୁମେ ମହାମାୟୀ

କୃପା କର ଅକିଞ୍ଚନେ,

ଶୁଦ୍ଧ ହୃଦୟରେ କରୁଛି ବନ୍ଦନ

ଭାବର ପଦ୍ମ ଆସନେ ।

ଭାବ ଗୋମୟରେ ହୃଦାସନ ଲିପି

ବସିଛି ତୋ ପ୍ରତୀକ୍ଷାରେ,

ମାଣବସା ଆଜି ପୂଜିବି ଚରଣ

ଗୁରୁବାର ପ୍ରଭାତରେ। 

ତୁମ ବନ୍ଦନାରେ ପୁରି ଉଠେ ଆଜି

ଆସ ମାଗୋ ସନାତନୀ,

ଢ଼ାଳି ଦିଅ ତୁମ ଅଭୟ ଆଶିଷ

ଧରଣୀ ହେଉ ପାବନୀ ।