କୁଳ ବଧୂ

ସାଧବ ବୋହୁ ଲୋ ସାଧବ ବୋହୁ,

ଲାଲ୍ ପାଟ ପିନ୍ଧି ଝଟକୁ ଥାଉ ||

ରୂପସୀ ରୂପିଣୀ ଲାବଣ୍ୟବତୀ,

କଥା ଥିରି କହୁ ମଉନାବତୀ ||

ଅଲିଅଳ ଥିଲୁ ଅଳସି କନ୍ୟା

ବଧୂ ନିରୁପମା ସର୍ବ ଗୁଣ ସଂପୂର୍ଣ୍ଣା ||

ଆଖିରେ କଜଳ,ପାଦେ ଅଲତା,

ଲାଲ୍ ସିନ୍ଦୁରେ ଶୋଭେ ତୋ ମଥା ||

ପାଦରେ ଝୁଣ୍ଟିଆ,ପାଉଁଜି ଶୋଭେ,

ନାକ ନୋଥ ତୋର ନାକେ ବିରାଜେ ||

ରୁଣୁଝୁଣ ଚୁଡି ବାଦ୍ୟ ମୁର୍ଚ୍ଛନା

ଜଣାଏ ତୋ ଆଗମନ ସୂଚନା ||

ହାତେ ଲମ୍ବ ତୋର ଲାଲ୍ ଓଢଣୀ

ଲାଜକୁଡୀ ଲତା ଲାଜୁଆ ଚାହାଣୀ ||

ଘରକୁଳ ବଧୂ ଲକ୍ଷ୍ମୀ ପ୍ରତିମା

ଗୃହଲକ୍ଷ୍ମୀ ମା' ତୁ ଅନ୍ନପୂ୍ର୍ଣ୍ଣା ||

ଦେବୀ ସରସ୍ବତୀ ମା' ବୀଣାପାଣୀ

ପ୍ରଥମ ଗୁରୁ ସନ୍ତାନର ତୁ ଲୋ ଜନନୀ ||

ରୋଗ ବେଳେ ବଇଦ, ପଥି ଉପଶମ

ଉଜାଗର ହୋଇ କରୁ ଯତନ ||

ମା' ଦୁର୍ଗା ,ଅମ୍ବେ ତୁ ଦଶଭୁଜା

ସର୍ବ କାର୍ଯ୍ୟେ ଅଗ୍ରେ ତୁ ଲୋଡା ଖୋଜା ||

ଜନକ ନନ୍ଦୀନୀ ବିନା ମର୍ଯ୍ୟଦା ପୁରୁଷ ଅଧୁରା

ମହା ଅଶ୍ବମେଧ ଯଜ୍ଞ ହୁଏନି ପୁରା ||

ବାମାଙ୍ଗୀ ଅଟୁ ତୁ ପ୍ରାଣ ପ୍ରୀୟର

ତ୍ୟାଗ,ସ୍ନେହ,ପ୍ରେମ ର ଉପହାର ||

ସୁଧା, ପୀୟୁଷ ତୁ ସଂଞ୍ଜୀବନୀ

ଘର ପ୍ରାଣକେନ୍ଦ୍ର ମନ ମୋହୀନୀ ||

ସବିତା ଆଗରୁ ତୋ ନିଦ ଭାଙ୍ଗେ

ଗୃହ କାର୍ଯ୍ୟ କରୁ କେତେ ସରାଗେ ||

ଘର ଅଗଣା ରେ ମା' ବୃନ୍ଦାବତୀ

ପାଣି ଢାଳୁ ତୁ ତାଙ୍କଠି ନିତି ||

ସଞ୍ଜେ ସଞ୍ଜବତୀ ଦେଉ ତୁ ନିତି

ମୂରୁଜ ଆଙ୍କୁଲୋ ସୌଭାଗ୍ୟବତୀ ||

ମାଗୁଶୀର ମାସ ଲକ୍ଷ୍ମୀ ଗୁରୁବାର

ଝୋଟି,ଚିତା କରୁ କେତେ ପ୍ରକାର ||

ନା ନା ସୁସ୍ବାଦ ବ୍ୟଞ୍ଜନ ଗଢୁ

ମନ ଜାଣି ଅତି ପ୍ରସନ୍ନେ ବାଢୁ ||

କାର୍ତ୍ତିକ ମାସରେ ହବିଷ ପାଳୁ

ବୋଇତ ବନ୍ଦିବୁ କେତେ ତୁ ଭାଳୁ ||

ଆସିବ ଫେରି ସାଧବ ପୁଅ

ଧନ,ରତ୍ନର ଛୁଟିବ ସୁଅ ||

ବାର ମାସେ ତେର ପରବ ଆମ

ପାଳୁ ତାକୁ ଦେଇ ତୁ ମନ ପ୍ରାଣ ||

କେତେ ଉପବାସ ବରତ କରୁ

ପରିବାର ସର୍ବ ଦୁଃଖ ତୁ ହରୁ ||

କିଏ ହେବ ସରି ତୁ ଅନୁପମା

ରୂପ,ଗୁଣ ର ତୋ ନାହିଁ ଉପମା ||

ସର୍ବସଂହା ମା' ଧରିତ୍ରୀ ମାତା

ଯାଦୁକାରୀଣୀ ତୁ ଜଗତଜିତା ||