କେମିତି ଖେଳିବି ହୋଲି

ତମେ ନାହଁ ବୋଲି ବସନ୍ତ ଆସିନି

    ରଙ୍ଗର ପସରା ମେଲି

ମନ ବୃନ୍ଦାବନେ ବୈଶାଖୀ ରାଜୁତି

   କେମିତି ପାଳିବି ହୋଲି..... !

ଜୀବନଟା ଲାଗେ ବେରଙ୍ଗ ବେରଙ୍ଗ

   ନିଜକୁ ଖୋଜୁଛି ନିଜେ

 ଛଳନାର ଏଇ ମରୁ ପ୍ରାନ୍ତରରେ

   ନିଇତି ପଥିକ ସାଜେ.....

ଭାରି ଭାରି ଲାଗେ ଜହ୍ନର ଜୋଛନା

   ଫିକା ଫିକା ଏ ଜୀବନ

 କଣ୍ଟକିତ ଆଜି ମୋ' ହୃଦ ଗାଲିଚା

    ଦେହକୁ ଜାଳେ ଫଗୁଣ.....

ଅମାନିଆ ଭାରି ଖିଆଲି ମନ ମୋ

   ପାଶେ ତୁମେନାହଁ ବୋଲି

 ସ୍ଵପ୍ନ ରାଇଜର ସୌଦାଗର ସାଜି 

   କେମିତି ଖେଳିବି ହୋଲି.....!

【ସନ୍ତୋଷ ପଟ୍ଟନାୟକ】