କାଳିଆ ଗୋସାଇଁ

ଦୁଃଖୀଜନ ପାଇଁ କାଳିଆ ଗୋସାଇଁ

ନାହିଁ କିବା ତୋର ମନରେ ଦୟା

ଅଛି ଯଦି ଭାବ ତୁଟାଇ ଦେ ଲୋଭ

ଟାଣି ନେଇଯାଆ ଲଗାଇ ମାୟା ।

ଚନ୍ଦନ ବାସରେ ଦୟଣା ମାଳରେ

ସଜାଇ ବସିଛୁ ରୂପ କାନ୍ତିକୁ

ସୁଭଦ୍ରା ପାଖରେ ବଳିଆ ସାଥିରେ

ଗୁଣି କରିଦେବୁ ମୋର ମନକୁ ।

ଶିରିକ୍ଷେତ୍ର ଛୁଇଁ ଧନ୍ୟ ହେବି ମୁହିଁ

ଦେଖିବି ମୋହନ ରୂପକୁ ତୋର

ବାଇଶି ପାହାଚେ ଗଡିବି ମୁଁ ଥରେ

ଧୋଇଦେବି ସବୁ ପାପକୁ ମୋର ।

ଜୀବନ ଜଞ୍ଜାଳ ଭୂଲିବି ସକଳ

ତୁଣ୍ଡେ ଗାଇ ଗାଇ ତୋହରି ନାମ

ଜାଣିଛି ଠାକୁର ତୁ ପରା ଅଧିର

ପାଇବାକୁ ଟିକେ ଭକତ ପ୍ରେମ ।

ଅତି ଆନନ୍ଦରେ ଟଙ୍କ ତୋରାଣୀରେ

ଦୂର କରିଦେଇ ସକଳ ଶୋଷ

ଅବଢ଼ା ଅନ୍ନରେ କି ଯାଦୁ ସତରେ

କରିଦେବି ପ୍ରଭୁ କ୍ଷୁଧାକୁ ନାଶ ।

ହସ ହସ ହୋଇ ଜଗତର ସାଇଁ

କରୁଣାର ବାରି ଝରାଇ ଦେଇ

ଜୀବନ ପ୍ରଦୀପ କରିଦେବୁ ଲୋପ

ସ୍ୱର୍ଗଦ୍ୱାରେ ମୋର ଜଳିବ ଜୁଇ ।