ଜହ୍ନର ଠିକଣା

ଖୋଜି ପାଇଲିନି ଜହ୍ନର ଠିକଣା

କେଉଁଠି ହଜାଇଦେଲି,

ଜହ୍ନ ହଜିଗଲା ତାହାରି ବାଟରେ 

ଖୋଜି ଖୋଜି ଥକିଗଲି |୧|

ପଚାରି ବୁଝିଲି ତା ସାଥି କଇଁକୁ

ଜହ୍ନ କାହିଁ ଗଲାବୋଲି,

ସିଏ ବି କହିଲା କାଲିଠୁଁ ଦେଖିନି

ଝୁରିଝୁରି ଶୁଖିଗଲି |୨|

ଭ୍ରମର ପଛରେ ଧାଇଁ ଧାଇଁ ଗଲି

ସେ କହିଲା ନାଇଁ ନାଇଁ,

ନାଇଁ ମୁଁ ପାଉନି ଜହ୍ନର ଠିକଣା

ମୋତେ କହି ଯାଇନାହିଁ |୩|

ଲୁଚେଇଲା ମୁହଁ ସୁନ୍ଦରୀ ଚାନ୍ଦିନୀ

ଖେଳୁଥିଲା ଲୁଚକାଳି,

ମେଘ ଆକାଶରେ ବାଦଲ ଭିତରେ

ହଜିଗଲା କଳା ବୋଳି |୪|

ଆଷାଢ଼ ମେଘରେ ଝରା ଶ୍ରାବଣରେ

ବହୁଥିଲା ଗୋଳି ପାଣି,

ଗୋଳି ପାଣି ଧାରେ ହଜିଥିବ ବୋଲି

ଖୋଜୁଥିଲି ଲୁଗା କାନି |୫|

ମନ ଦୁଃଖ ହେଲା ଜହ୍ନ ଖୋଜି ଖୋଜି

ଆକାଶର ନୀଳିମାରେ,

ନୀଳ ଆକାଶଟା ସାଗର ଜଳରେ 

ହଜିଗଲା ସଞ୍ଜ ପରେ |୬|

ଜହ୍ନର ଠିକଣା ଚାନ୍ଦନୀ ପାଉଣା

କରୁଥାଏ ବାଟବଣା,

କାଳେ କେବେ ପୁଣି ଦେଖା ହେବ ବୋଲି

ସବୁ କଥା ତାକୁ ଜଣା |୭| 

ଖୋଜିଲି ପୂର୍ଣ୍ଣମୀ ଶୁକଳ ପକ୍ଷରେ

ମୋ ଜହ୍ନକୁ ପାଇବାକୁ,

ଜହ୍ନ ଆସୁଥିଲା ଧିମେଇ ଧିମେଇ

ପ୍ରଜାପତି ଧରିବାକୁ |୮|

ଏତେଟା ମନୋଇ ମୋର ପ୍ରିୟା ଜହ୍ନ

ଗୁଣୁଗୁଣୁ ଗୀତ ଗାଏ ,

ଆପଣା ଭିତରେ ଆପେ ହଜିଯାଏ

ଆନନ୍ଦରେ ଫୁଲ ଛୁଏଁ |୯|

ଶେଷ ପାହାଚରେ ପାଇଗଲି ମୁହିଁ

ଜହ୍ନ ପ୍ରିୟାର ଠିକଣା,

ଝରକା ଦୁଆରେ ତୋଫା ମୁହଁ ତାର

କରୁଥିଲା ଆନମନା |୧୦|