ହାଟ
ହାଟ
![](https://cdn.storymirror.com/static/1pximage.jpeg)
![](https://cdn.storymirror.com/static/1pximage.jpeg)
ହାଟ ବଜାରରେ ବିକା କିଣା ଚାଲେ
ଭିନ୍ନ ଭିନ୍ନ ଜିନିଷର,
ଆବଶ୍ୟକତାର ପରିପୂର୍ଣ୍ଣ ହୁଏ
ଦିଆନିଆର ବେଭାର |୧|
ରଙ୍ଗ ବେରଙ୍ଗର ଜିନିଷ ଦେଖିଲେ
ଭୁଲିଯାଏ ଏହି ଆଖି,
କେବେ କେତେବେଳେ ଭୁଲାଣିଆ ମନ
ଭୁଲିଯାଏ ରଙ୍ଗ ଦେଖି |୨|
ପକେଟରେ ଅର୍ଥ ଥାଉ ବା ନଥାଉ
ମନ ରୋକି ପାରେ ନାହିଁ,
ସମସ୍ତ ରଙ୍ଗିଲା ଜିନିଷ ନେବାକୁ
ମନ ହାଇଁପାଇଁ ହୋଇ |୩|
କିଏ ଚାଲିଚାଲି କିଏ ତ ଗାଡ଼ିରେ
ହାଟ କରିବାକୁ ଯାଏ,
ହାଟ ସରିଗଲେ ନିଜ ନିଜ ବାଟ
ଧରି ଫେରିବାକୁ ହୁଏ |୪|
ଆଖି ଦିଶୁଥିବା ହାଟକୁ ଦେଖିଲେ
ଏମିତି ପ୍ରତିତ ହୁଏ,
ସଂସାର ହାଟଟା ମୋଟେ ଦିଶେ ନାହିଁ
ଆଖି ଝଲସାଇ ଦିଏ |୫|
ଦୁନିଆଁ ହାଟଟା ବଡ଼ ରଙ୍ଗମଞ୍ଚ
ଆମେ ସବୁ କଳାକାର,
ନାଟ ସରିଗଲେ ଯିଏ ଯା ବାଟରେ
ବେଳ ହୁଏ ଫେରିବାର |୬|
ହାଟକୁ ଯିବାରେ ବଡ଼ ମଜାଲାଗେ
ରଙ୍ଗିନ ବଜାର ପାଇଁ,
ଫେରିବାର ବାଟ ବହୁ କଷ୍ଟ ଲାଗେ
ହାଟରୁ ବିଚ୍ଛେଦ ପାଇଁ |୭|
ସପ୍ତାହିକ ହାଟ ହିସାବ କିତାବ
ପକେଟ ଖାତାରେ ଥାଏ,
ଦୁନିଆଁ ହାଟର ସୁକର୍ମ କୁକର୍ମ
ହିସାବ କରୁଛି ସିଏ |୮|
କିଏ କେତେ ଦେଲା କିଏ କେତେ ନେଲା
ଅଜାଣତ ଆମ ପାଇଁ,
ସବୁରି ହିସାବ ଜଣେ କରୁଅଛି
ସିଏ ଜଗତ ଗୋସାଇଁ |୯|
ଭିତରେଇ ଦେଖ ଦୁନିଆଁ ହାଟକୁ
ସବୁ ଦେଖା ମିଳିଯିବ,
ପ୍ରଭୁ ପଦରେ ଶରଣ ପଶିଲେ
ହାଟ କଥା ବୁଝିହେବ |୧୦|