ହାତ ସାଥେ ହାତ ମିଶାଇଦେବା

ହାତ ସାଥେ ହାତ ମିଶାଇ ଦେବାରେ

ହୋଇ ଏକ ମନ ପ୍ରାଣ

ଓଡିଶା ମାଟିରେ ଗାଇବା ଆମେରେ

ସ୍ଵଚ୍ଛତାର ଜୟଗାନ ।

ବାତ୍ୟା ପରି କ୍ରୁର ଦୈଵ ଦୁର୍ବିପାକ

ତାଣ୍ଡବର ଲୀଳା ରଚି

ସୁନ୍ଦର ଶ୍ୟାମଳ ଉତ୍କଳ ମାତାକୁ

ଦୁଃଖ ଦେଇଗଲା ଯାଚି ।

ଟଳିଲା ପାଦପ ସୁଉଚ୍ଚ ସଉଧ

ମାଟି ପରେ ଗଲେ ମିଶି

ନାନା ଆବର୍ଜନା ଚତୁର୍ଦ୍ଦିଗେ ପଡି

ରୋଗବ୍ୟାଧି ଯିବ ଗ୍ରାସି ।

ନିଜ ସୁଖ ପାଇଁ ଏକତ୍ରିତ ହୋଇ

ଆବର୍ଜନା ସଫା କରି

ପୋଡି,ପୋତିଦେବା ସେସବୁ ଅଳିଆ

ମନ ମଧ୍ୟେ ଖୁସି ଭରି ।

ପରିବେଶ ରକ୍ଷା ଆମରି ସୁରକ୍ଷା

ଆମ ହାତେ ଅଛି ଭାଇ

ବୃକ୍ଷଶୂନ୍ୟ ହୋଇ ପ୍ରକୃତି କାନ୍ଦୁଛି

ସନ୍ତୁଳନ ରକ୍ଷା ପାଇଁ ।

ଭୂଲିଯାଇ ମନୁ ବାତ୍ୟାର ପ୍ରକୋପ

ହୃଦୟକୁ ଦମ୍ଭ କରି

ପୁଣି ଗଢ଼ିଦେବା ଆମରି ସପନ

ବାତ୍ୟା ଦେଖି ଯିବ ହାରି ।

ବାଡ଼ି ବଗିଚାରେ ଅବା ରାସ୍ତାକଡେ

ଅନାବାଦୀ ଭୂମିପରେ

ମିଳିମିଶି ସର୍ବେ ଗଛ ଲଗାଇବା

ନିଜ ନିଜ ଉଦ୍ୟମରେ ।

ଏକତାର ବଳ ହୁଏନା ବିଫଳ

ମନ ମଧ୍ୟେ ଟିକେ ହେଜ

ହାତ ସାଥେ ହାତ ମିଶାଇଲେ ଆମେ

ସୁନା ହୋଇଯିବ ରାଜ୍ୟ ।