ଗୋଧୂଳି...୩

#ଗୋଧୂଳି - ୩ -

*************

  ଆଜିର ଦିନ ଟି ସତରେ ସରି ଆସିଲା କି.....?

ନା ନା ସରିବନି ।

ଏମିତି କେମିତି ସରିଯିବ ଯେ ,

ଏ ଯାଏଁ ତ ବାକି ଅଛି 

ମୋର ପ୍ରତି ଟି ଦାୟିତ୍ବ ।

ଏ ପ୍ରହର ତ ଏମିତି ଯାଉଛି 

ଯେମିତି ଖସିଯାଏ ହାତମୁଠାରୁ ବାଲୁକା ,

ଏ ସମୟ ତ ଏମିତି ହଜି ଯାଉଛି 

ଯେମିତି ମିଳେଇ ଯାଏ 

ପାଣି ଫୋଟକା ।

କେମିତି ଅଟକାଇବି ଏ ସମୟ କୁ ....

କେହି କଣ ଅଟକାଇ ପାରେ ସମୟକୁ.....

ହଁ ଏ ତ ସେ ପୁରାଣ ନୁହେଁ 

ଯେଉଁଠି ସତୀଟିଏ ପାଇଁ ରାତି ବି ପାହିବାକୁ କୁଣ୍ଠିତ ଥିଲା , 

ସେ ସିନା କହିଥିଲେ "ନ ପାହୁ ରାତି ନ ମରୁ ପତି"

ହେଲେ .......

ମୁଁ କଣ କହିବି ମୋ ଭୋକିଲା ପିଲାକୁ.....

ମୋ ସ୍ତ୍ରୀ କୁ......

କଣ କହି ବୁଝାଇବି ମୋ ରୋଗିଣା ମା କୁ.......

ଏଇଆ ଯେ ତୋର ଏ ରିକ୍ସାବାଲା ପୁଅ ଅସମର୍ଥ, 

 ଏଇଆ ଯେ ତା ପାଇଁ ସମୟ ଅଟକୁନି ।

କଣ କହିବି........

ଏଇଆ ଯେ ସବାରି ଟିଏ ମିଳିଲାନି ।

ଏଇ ମୋର ରିକ୍ସା ଦେଖିଛି 

ଭିନ୍ନ୍ ରୂପୀ ,ଭିନ୍ନ ମୁଖୀ ମଣିଷକୁ ।

କଲେଜ ଛାତ୍ର ଛାତ୍ରୀର ପ୍ରତି ଟି ପ୍ରେମର ଶବ୍ଦକୁ 

ଅନୁଭବ କରିଛି ଏଇ ତିନି ଚକିଆ ,

ସହାନୁଭୂତି ହୃଦୟ ଟିକୁ ନେଇ 

କେବେ ପାଇଛି ବକସିସ୍ ,

କେବେ ପୁଣି ମିଳିଛି ଧିକ୍କାର ।

ନିଜେ ସିନା ମୁଁ ପଢିନି ଦୁଇ ଅକ୍ଷର 

ହେଲେ ଜ୍ଞାନୀ ,ଗୁଣୀ ସଭିଙ୍କୁ କୋଳରେ ବସାଇଛି 

ଏ ମୋ ରିକ୍ସା.....

ହେଲେ ଆଜିର ମୋ ଖାଲି ପକେଟ 

କି ଜବାବ୍ ଦେବ ,

ଭୋକିଲା ପେଟକୁ ଦାନା କେମିତି ଦେବ , 

ଜାଣିଛି ... ମୁଁ ଜାଣିଛି 

ସବୁରି ମନ ଖୋଜେ 

ଦିନଟୁ ସରୁ , ଟିକିଏ ଆରାମ ମିଳୁ ଏ ତନୁକୁ ।

ହେଲେ ମୁଁ ଖୋଜୁନି ସେ ଆରାମ ,

ମୁଁ ଚାହୁଁନି ଏ ସୂର୍ଯ୍ୟ ଅସ୍ତ ହୁଅନ୍ତୁ ,

ଚାହୁଁନାହିଁ ଏ ସମୟ ଆଗେଇ ଯାଉ ।

ମୁଁ ଅଟକେଇ ଦେବାକୁ ଚାହୁଁଛି ଏ ଗୋଧୂଳିର ସମୟକୁ ... 

ଏଇଠି.........

ହଁ ଏଇଠି...............

ମୋର ଭିତର ପିତୃ ମନ କହୁଛି 

ହଁ ସମୟ ଅଟକି ଯାଉ ,

ଅନ୍ତର ର ପୁତ୍ର ମନଟି ବିକଳେ 

କହୁଛି ଘର ଫେରନ୍ତା ପଥିକ 

ଆସ ମୋ ପାଖକୁ ,

ମୋର ଏ ଅନ୍ନଦାତ୍ରୀ ଖୋଜୁଛି ତୁମକୁ 

ତା କୋଳରେ ସେ ମିଟେଇ ଦେବ 

ତୁମ ପାଦର ହାଲିଆ ପଣକୁ ,

କିଛି ମାଗୁନି ସେ ଖାଲି ମାଗୁଛି ,

ତା ର ପାରିଶ୍ରମିକ .......

ହେଲେ ସତେ କଣ ଅଟକିବ 

ଏ ଗୋଧୂଳିର ଏଇ ମୁହୂର୍ତ୍ତ ....

କେବଳ ମୋ ପାଇଁ .....

କଣ ସେ ଅଟକାଇ ପୂରଣ କରାଇପାରିବ

ମୋ ମନର ଇଚ୍ଛା......

କଣ ଏଇ ଗୋଧୂଳିର ବେଳ ଟିକିଏ ଅଟକି

 ଦେଇ ପାରିବ ମୋର 

ଏ ଅଧରକୁ ହସିବା ପାଇଁ କାରଣଟିଏ...............