ଗଙ୍ଗଶିଉଳି

ଟିପି ଟିପି ଏଇ     କାକର ବିନ୍ଦୁର

    ଆୟୁଷ କେତେ ବା କୁହ,

ସୁରୂଜ ଉଇଁଲେ    ହଜିଯାଏ ସେତ

    ଦେଖାଇ ପାରେନା ମୁହଁ।।

ଘାସ ପରେ ରହି   ଚମକ୍ ଦିଏ ସେ

      ସ୍ପନ୍ଦନେ ବଢାଏ ପ୍ରୀତି,

କିଛି କ୍ଷଣ ପରେ  ଉଭେଇ ଯାଏ ସେ

     ପ୍ରୀତି କରିଦେଇ ଇତି।।

ଗଙ୍ଗଶିଉଳି ର  ଭାଗ୍ୟ ଟା ମୋହର

    ସକାଳକୁ ଝରି ଯିବ,

ତାର ଭାଗ୍ୟ ନାହିଁ  ସକାଳ ଦେଖିବା

     କାକର ସାଥେ ଝଡିବ।।

ଦୁହିଁଙ୍କର ଭାଗ୍ୟ   କିଏ ସେ ଗଢିଲା

    ଅଧା ଲେଖିଲା କାହାଣୀ,

ରାତି ପାହିଗଲେ   କାହାଣୀ ସରୁଛି

    ଜୀବନ ଯାଉଛି ପୁଣି।।

ହାରିଗଲା ଆଜି    ଜୀବନ ନାଟକ

   ହାରିଲା ଛଳନା ପାଖେ,

ହାରିଗଲି ଆଜି    ନିଜ ପାଖେ ମୁହିଁ

   ଚାଲୁଛି ମୁଁ ଛାଇ ସାଥେ।।