ଏ ରଙ୍ଗ ରଙ୍ଗହୀନ

ଏ ରଙ୍ଗ ରଙ୍ଗହୀନ 

ଯଦି ସଧବା ମଥାରେ 

ନାଲି ଟହଟହ ସିନ୍ଦୁର ନାହିଁ 

ଖରାବେଳେ ଝଡିବର୍ଷା ଛାଡିଲେ 

ଆକାଶରେ ଇନ୍ଦ୍ରଧନୁ ନାହିଁ 

ଏ ରଙ୍ଗ ରଙ୍ଗହୀନ 

ଯଦି ସକାଳୁ ସଞ୍ଜ ହଳଦୀବସନ୍ତ 

ସଜନାଡାଳରେ ବସୁନାହିଁ 

ଯଦି ନାଲିଗୋଡି ରାସ୍ତା କଡରେ 

ଥିବା ଅନାବନା ଗଛରେ 

ନାଲି ରଙ୍ଗର ଧୂଳି ନାହିଁ 

ଏ ରଙ୍ଗ ରଙ୍ଗହୀନ 

ଯଦି କୃଷ୍ଣଚୂଡ଼ାର ଲହରୀ ନାହିଁ 

ଯଦି ସାଗରର ନୀଳାଭ ଢ଼େଉ ନାହିଁ 

ଅବା କେବେ ଆକାଶେ କଳାଧଳା 

ବାଦଲମାନେ ଘୁରନ୍ତିନାହିଁ 

ଏ ରଙ୍ଗ ରଙ୍ଗହୀନ 

ଯଦି ବାଳସୂର୍ଯ୍ୟର ରକ୍ତିମ ଆଭା 

ସୁଦୂର ପାହାଡ଼େ ପଡେନାହିଁ 

ଯଦି ଧୁଧୁ ଖରାରେ ଚକଚକ 

ସୁନେଲି କିରଣ ପୋଖରୀ

ପାଣିରେ ଛଳଛଳ ହୁଏନାହିଁ 

ଏ ରଙ୍ଗ ରଙ୍ଗହୀନ 

ଯଦି ମଣିଷ ଭିତରେ ସ୍ନେହ ନାହିଁ 

ସୁଖ ଶାନ୍ତି ମୈତ୍ରୀ ନାହିଁ 

କଅଁଳ ଶିଶୁର କାନ୍ଦନାହିଁ 

ଅବା ପାକୁଆ ପାଟିରେ ହସ ନାହିଁ ।